VAR Moskvami.

VAR dommerilu

Ulluni makkunani isikkamik arsarluni nunarsuarmi pissartanngorniunnerni dommeri nalornissuteqalersimaguni, imaluunniit siutequtiminit isussuffigineqarsimaguni, video atorlugu susoqarsimanersoq takusarsinnaavaa. Uani unammersuarnermi marlussoriarluni tamanna pereerpoq.

VAR tassaavoq “Video Assistant Referee” – video atorlugu dommerimut ikiuut. Timersuutsini arlalippassuarni periuseq taanna atorneqareerpoq, maannalu misiliutigalugu FIFA-p atorpaa.

Russit Nunaanni sumiluunniit unammineq ingerlanneqaraluarpat, VAR pinerit tamaasa aalajangersimasumik Moskvami inissisimasarpoq. Tassaniippoq “dommeriuneq” aamma ikiortai pingasut.

Arsaaffiup iluani assiliissutit 33-t inissisimasarput, taakkunannga 12-t kigaatsunngorlugu takutitsisinnaasut. Offsidertunut sissuertussatut marluk atorneqartarput, aamma arsaattut naligiillutik inissisimasimatillugit isertitseriarneq atorlugu ajugaaniuttoqartussanngoraangat isertitsiffissat tunuani kigaatsunngorlugu takutitsisinnaasut immikkut ikkunneqartarput.

VAR-ip atuuffigisinnaassai tassaapput arsarnerup inerneranut allanngortitsisinnaasut, soorlu isertitsinerit, pillaatisinerit, anisitsinerit kinalu iliorsimaneranik nalorninerit pigaangata.

VAR-imiittut isumaqarunik dommeri kukkusoq, taava qaquguluunniit attaveqarfigisinnaavaat qanorlu iliornissaanik siunnersorlugu. Killormut dommeri aalajangiisimanerminut nalornileruni, taava VAR attavigalugu ikioqqusinnaavoq, tamannalu dommerip siutequtiminut tikkuarneratigut pisarpoq.

Taamaattoq qanorluunniit – pisarnertut – dommeri kisimi aalajangiisinnaatitaavoq.

Aaqqissuisut

Nunarput pillugu sammisaqarfik