Ukiut qulit ingerlaneranni pisassiissutit utertinneqassapput

Suleqatigiissitsisut isumaqarput, aalisarneq aalisakkanillu pisassiissuteqartarneq aaqqissuuteqqinneqassappat, tatigineqarsinnaasumik periuseqarnissaq pingaartuusoq.

– Ilisimasakka naapertorlugit nunatsinni pisassiissutinik utertitsisoqarnikuunngilaq. Aalisarnermi pisassiissuteqarneq eqqartorneqaleraangat pineqartarpoq, pisassiissutit aalisartooreersunut tunniunneqartarnerat. Tamanna isumaqarluarpoq, ukiorpassuimmi aalisarsimagaanni taava aalisarnissamut pisinnaatitaaffeqartoqalersimasarpoq, Suleqatigiissitsisut sinnerlugit, Michael Rosing oqarpoq. Assersuuteqarporlu:

– Ilaqutariit ukiorpassuarni kuup eqqaani tupertarsimasut, sumilluunniit allassimasoqanngikkaluartoq tuperfik ‘pigilertarpaat’.

Michael Rosing nangilluni oqarpoq, alla eqqarsaatigisariaqartoq tassaasoq, qanoq iliorluni pisassiissutinik piginnneqataassutsit utertinneqartassanersut.

– Eqqarsaatigilluaraanni, taava pisassiissutit atuuffissaat qaangiuppat tuniniaannarneqarsinnaasunik peqartoqanngilaq. Kilisaatit, suliffissuit, simmarteriviit, nioqquteqartarfiit aamma pisisartut akornanni tatiginninneq pineqarput. Niuernermi attavippassuit qangarsuaaniilli piusarput. Pisisartut aalisartitseqatigiiffiit tatigisarpaat. Qanoq sivisutigisup ingerlanerani tamakkorpassuit pilerseqqinneqarsinnaappat aamma inuiaqatigiit isertitassaraluaminnik qassersuarnik annaasaqassappat, Michael Rosing aperivoq.

– Periuseq piviusorsiortoq takusinnaasatuara tassaavoq, sivikinnerpaamik ukiut qulit ingerlanerini ataavartumik pisassiissutit utertikkiartuaarneqarsinnaanerat. Kisianni taamaaliorutta – partiit amerlanerit piumasaattut – kikkut tamarmik peqataanissaat anguneqassava? Pisassiissutinik pisortat tungaaniit nioqquteqartuaraanni, qularaara aalisartut nutaat aningaaserivimmit taarsigassarsitinneqarsinnaasassasut, Michael Rosing oqarpoq.

– Inuiaqatigiit tamatta pigisatsinnik naassaanngitsumik atuisinnaatitaanissaq kissaatiginanngilaq. Kisianni eqqarsaatigilluagaanngitsumik pipallattumillu aaqqissuusseqqittoqassappat, taava piffissaleriigaanngitsumik pisassiissarneq kissaatiginartinneruara, Michael Rosing oqarpoq.

 

Aaqqissuisut

Nunarput pillugu sammisaqarfik

%d bloggers like this: