Tusagassiortut: Kalaallit Nunaanni isornartorsiuisoqanngilaq

Misissueqqissaarluni tusagassiorneq aaqqissuisoqarfinni salliutinneqarneq ajorpoq, aamma apersorniarneqartut oqaaseqarnissartik annilaangagisarpaat. Taamak Kalaallit Nunaanni tusagassiortut marluk Journalisten.dk-mit apersorneqarlutik oqarput.

Apersorneqarnerat Dansk Journalistforbundip Kalaallit Nunaannut immikkoortortaqarfiani ataatsimeersuartoqarneranut atatillugu pivoq.

Kalaallit Nunaanni tusagassiornerup iluani suut unamminarnerpaattut isigaagit?

Merete Lindstrøm, 38-nik ukiulik KNR.gl-milu tusagassiortutut sulisoq akivoq:

– Maannamut Kalaallit Nunaanni sivikitsumik sulisimalerlunga paasisimavara, isorisaqarluni tusagassiorneq oqarusuttoqartannginnera pissutigalugu ingerlakkuminaattartoq, tassami inuiaqatigiit ikittunnguupput aamma kikkut tamarmik imminut kinaassusersisinnaapput. Suleqatigiinnissamut periarfissat, inuttut attaveqaatit, suliffik allallu apeqqutaalertarput. Pissutsit tamakku Danmarkimi allarluinnaapput, Merete Lindstrøm oqarpoq.

Suliaqarfimmut tunngatillugu suna unamminarnerpaattut isigaajuk?

– Kalaallit Nunaanni unamminartoq annertooq tassaavoq pikkorissunik atorfinitsitsisinnaanneq. Pinerit tamaasa amerlasuut qinnuteqartanngillat. Ilinniakkaminnik naammasseqqammersimasut periarfissaapput, kisianni aaqqissuisoqarfimmut iluaqutaassaaq ukioqqortuut inuusuttullu akulerullugit sulisorineqarsinnaappata, taanna oqarpoq.

Kalaallit Nunaanni tusagassiornerup iluani suut unamminarnerpaattut isigaagit?

Mariia Simonsen, 63-nik ukiulik, Ilisimatusarfimmi tusagassiornermut ilinniartitsisuusoq, aamma siusinnerusukkut KNR-imi aaqqissuisuullunilu tusagassiortuussimasoq akivoq:

– Unamminarnerpaat ilagaat misissuilluni tusagassiornermik ingerlatsinissamut periarfissaritinneqartut. Imaanngilaq tusagassiortut taamak ingerlatserusunngitsut. Aaqqissuisoqarfiilli tamakkuninnga ingerlatsinissamik salliutitsisanngillat. Uanga nammineq Radioaviisimi aaqqissuisutut sulisimavunga, aamma taamaakkami suna oqallisiginerlugu ilisimasaqarfigaara. Sumik arlaanik salliutitsilluni ingerlatsigaanni, taava salliutitaq iliuuseqarfigineqartarpoq. Qangaanerusoq aviisit KNR-illu aaqqissuisoqarfii suleqatigiittarsimapput. Assersuutissaqqissoq tassaavoq Radioaviisi Sermitsiarlu suleqatigiillutik ilassinnissutit qanoq atorneqartarnerannik misissuimmata. Tamanna allagaatinik takunnissinnaatitaaneq sakkugalugu pivoq, 1990-kkullu aallartilaarnerani pilluni. Qanoq amerlatigisunik sulisoqarneq apeqqutaanngilaq, tassami taamani aamma tusagassiornerup iluani sulisorpassuaqanngilaq. Piumagaanni ajornanngilaq, Mariia Simonsen oqarpoq.

Suliaqarfimmut tunngatillugu suna unamminarnerpaattut isigaajuk?

– Siulittaasunngortup (Journalistforbundimi, aaqq.) oqarneratuut: Makku pisinnaasorisut unamminartorsiorfigaavut. Internetimi oqaloqatigiittarfiit unamminartorsiorfigaavut. Inuit namminneq nutaarsiassaliortarput, tamannalu ajornartorsiutaavoq, taanna oqarpoq.

Sooq taamak ajortigaa?

– Akerlilerneqartanngillat aamma illuinnarsiortuussarput. Taakku uagullu assigiinngissuserput tassaavoq, uagut illuinnaasiunngitsumik ingerlatsiniartussaagatta, tassami pineqartumi illuatungeriit pinerit tamaasa ilaatinneqartarput.

Qanoq iliuuseqarfigisinnaaviuk?

– Anguniarsinnaavarput kattufferput oqaaseqartalissasoq aamma oqallinnermut akuleruttalissasoq. Aamma tussagassiornerup, inuit oqaloqatigiittarfiannut sanilliullugu, qanoq assigiinngissuseqartoq kimigiiserluni inunnut eqqaasitsissutigineqartarsinnaavoq. Ajoraluartumillu oqartariaqarpunga tusagassioriaatsit arlallit eqqarsaatigalugit KNR-i ikiuinngimmat. Tusagassiornermut ilinniakkaminnik suli naammassineqanngitsut, aamma aviisiliortut atorfiginagu sulisussat, atorneqarnerat ajornartorsiutaavoq. KNR-ip tusagassiortunik atorfinitsitsisarnissaq aalajangiusimasariaqarpaa, tassami ilinniagaqarsimanani atorfinissinnaagaanni, taava sussalluni universitetimut qinnuteqartoqassava, Mariia Simonsen Journalisten.dk-mit apersorneqarluni oqarpoq.

Apersorneqarnerat februaarip 27-ani pivoq. Apersuisuullunilu assiliisuuvoq Rasmus Elmelund.