Putin aamma Trump Helsinkimi ataatsimeeqatigeereerlutik tusagassiortunik katersortitsisut.

Trump USA-mi tupigineqarpoq

Trump aamma Putin ullumi Helsinkimi ataatsimeeqatigiipput, kingornalu tusagassiortunik katersortitsisoqarmat qanoq inissisimasoqarnera pillugu silatunerulertoqanngilaq. Pingaartumik USA-mi akissutissarserusunneqarsimavoq kingullermik præsidentimut qinersisoqarmat Russit akulerussimaneranut tunngassuteqartut Trumpip qanoq akissutissarsisimanerai.

“Nunat taakku marluk akisussaatippakka. Isumaqarpunga USA sianiitsuliorsimasoq. Isumaqarpunga tamatta sianiitsuliorsimasugut”, Trump katersortitsinerup naggataagut oqarpoq.

Maannalu USA-mi naammaginngisaqarneq pilerpoq.

Naak tusagassiortut arlaleriarlutik apeqqummut akissuteqaqqusisaraluartut – tassalu qinersinermut akulerussimaneq kiinarsisitsissutigisimaneraa, Trump akiumasimanngitsoq ilaatigut CBS News ilisimatitsivoq.

– Taamaallaat apeqquteqaatigisinnaavara. Inuit uannut aggerput oqarlutik russit taamaaliorsimassasut. Præsident Putin oqarpoq russit taamaaliorsimanngitsut. Una oqaatigerusuppara, takusinnaanngilara sooq taamaaliorsimassasut. Tamaasa tatigaakka, Trump katersortitsinermi oqarpoq.

Oqaatsini tunngavilersorniarlugit ilanngullugu oqarpoq, Putinip akulerussimanermut tunngatillugu naaggaarnera “assut kimittusimasoq uppernarlunilu”.

Putinip aappaatigut oqaatigaa, Russit naalagaaffiat USA-p iluani pissutsinut akulerutinngisaannassasoq, aamma qinersinerit eqqarsaatigalugit. Tassunga ilutigitillugu oqaatigaa, russit aqqaneq-marluk manna Robert Muellerimit (akuleruttoqarsimaneranik ilaalu ilanngullugit USA-mi misissuititaq) unnerluutigineqartut apersorneqarnissaat periarfissiissutigerusukkini.

Trumpip tungaaniit suusupaginnittutut pissusilersorneq maanna USA-mi politikerit akornanni oqallisigineqalerpoq; ilaat nunamik killuussisuuneraapput ilaallu ileqimisaartorput.

 

Aaqqissuisut

Nunarput pillugu sammisaqarfik