Torontomi PDAC

Ukiut tamaasa Canadami aatsitassarsiortut peqatigiiffiat, PDAC, illoqarfissuarmi Torontomi nunarsuaq tamakkerlugu takutitseqqusiartortarpoq, suliffeqarfiillu tamakkuninnga ingerlatsisut ingerlatserusuttullu ornigarluartarpaat.

Aaqqissuussineq taanna 1932-mi aallartinneqaramili ukiut tamaasa alliartorsimavoq, ullumikkullu naapeqatigiissitsinerit taamak ilusillit pingaaruteqarnersaattut naatsorsuunneqalersimavoq.

Ukioq manna naapeqatigiissitsineq marsip pingajuaniit arfineq-aappaanut ingerlanneqassaaq.

Pisarnertut Sulisitsisut peqataatitsissapput, ukioq mannalu nunatsinniit peqataasussat 80-it missaaniipput, sulisitsisut saniatigut peqataasallutik aatsitassarsiornermut naalakkersuisoq taassumalu malitai aamma Inatsisartuni Inuussutissarsiornermut Aatsitassanullu Ataatsimiititaliami ilaasortat.

Pisarneq naapertorlugu PDAC-mi Sulisitsisut ulloqartitsissapput, taaguutilimmik Greenland Day. Tassani nunatsinni niuernissamut periarfissat nassuiaassutigineqassapput, aamma aatsitassat qaqutigoortut piiarneqarsinnaanerat ilanngullugu. Naalakkersuisoqarfik Kalaallit Nunaata sananeqaataa pillugu saqqummiussissaaq.

Kalaallit ulloqartitsisarnerat nalinginnarmik inunnit 200-nit ornigarneqartarpoq, tassanilu Fraser Institute pisarnermisut Kalaallit Nunaata qanoq inissisimaneranik nassuiaateqassaaq. Nalunaarusiami saqqummersinneqaqqammersimasumi takuneqarsinnaavoq, Kalaallit Nunaat 2017-mi aatsitassarsiorfissatut pilerinarnerpaat/tutsuiginarnerpaat akornanni normu 34-itut inississimasoq, tamannalu 2016-mut naleqqiullugu pitsanngoriaataavoq, tassami 2016-mi normu 55-tut inissisimasimammat.

Sulisitsisut Naalakkersuisullu ataatsimut oqariartuutigaat, ineriartorneq muminneqarsimasutut isikkoqartoq. Sulisitsisulli naammagittavinngillat:

– Kalaallit Nunaanni politikkikkut ingerlatsinerup tatiginartuunera eqqarsaatigalugu nikeriarneq annikitsuinnartut isigisariaqarpoq, Sulisitsisut tusagassiuutinut nalunaaruteqarlutik allapput.

———-

PDAC-mi peqataasartut ima agguataarneqarsimagajuttarput: Takutitsisut: 1.000. Aningaasaliissinnaasut: 4.000. Peqataasut: 24.000. Nunat assigiinngitsut: 130. PDAC tassaavoq Canadami aatsitassarsiorniat peqatigiiffiat (Prospectors & Developers Association of Canada).

 

 

 

Aaqqissuisut

Nunarput pillugu sammisaqarfik

%d bloggers like this: