Timersornermut Siunnersuisooqatigiit pilersinneqartariaqarput

Siumut sinnerlugu Inatsisartunut qinigassanngortittoq, Peter Davidsen oqarpoq, nunatsinni Timersornermut Siunnersuisooqatigiit pilersinneqartariaqartut.

– Taakku nunatsinni timersortartut atugaat ataatsimut pillugit aamma timersornikkut pinaveersaartitsineq, timersortartutut ileqqorissaarnissaq il.il. pillugit siunnersuisuussapput. Timersornermut Siunnersuisooqatigiit pilersinnerisigut tassunga ilisimasallit atorluarneqassapput, nunatsinni timersornerup peqqinnartumik aammalu pissuserissaartumik ileqqorissaartumillu ingerlanneqarnissaanut politikkerinut oqariartuuteqarsinnaassallutik, Peter Davidsen oqarpoq.

Taassumap ilanngullugu oqaatigaa, Timersoqatigiiffiit Kattuffiat suleqatigalugu pilersinneqartariaqartut, soorlu nunap immikkoortortaqarfiiniit inuussutissarsiuteqartuniillu ilaasortaqarnissaat qulakkeerneqarluni.

– Timersornermut Siunnersuisooqatigiit ilaatigut suleqatigalugit nunanut allanut unammisartugut unammiartoraangamik suliffimminniit akissarsiaminnik annaasaqannginnissaat sulissutigineqarsinnaavoq, taamaasilluta inuusuttagut timersornermik aallutallit ilaatigut amerliartortissinnaavagut, Peter Davidsen oqarpoq.

– Nalunngilarpummi unammisartutta ilai pilersugaqalereersimasut annertuumik nunarput sinnerlugu pilliuteqartartut. Nunanut allanut unammisartut meerartatsinnut inuusuttuarartatsinnullu maligassiuisussat pinaveersaartitseqataasussallu tapersersornerusariaqarpagut, Peter Davidsen naggasiivoq.

Aaqqissuisut

Nunarput pillugu sammisaqarfik

%d bloggers like this: