Pan Am 2018. Tigusiffik: KNR

Timersornermut aningaasaliinerusoqassanngilaq

Inatsisartunut ilaasortaq, Múte B. Egede (IA) juunip 26-ani § 37 aqqutigalugu Naalakkersuisunut apeqquteqarpoq, “timersornerup suli siuarsarnerunissaanut siammarnerunissaanullu sinaakkusiornissaminnut Naalakkersuisut qanoq pilersaaruteqarnersut”.

– Pilersaaruteqanngilagut, naalakkersuisunut ilaasortaq, Vivian Motzfeldt akissuteqarpoq.

Aamma atuaruk: Timersornerup aningaasaliiffiginerunissaa piffissanngorpoq

– Kalaallit Nunaanni Timersoqatigiit Kattuffiata aamma Elite Sport Greenlandip, Aningaasanut Inatsit aqqutigalugu tapiissutitut 8,4 millionit koruunit pisarpaat, aamma Danske Spilip kaaviiaartitaanit 20,5 millionit koruuninik tapiiffigineqartarput, Vivian Motzfeldt akissummi allappoq.

– Ukiuni kingullerni tallimani tapiissutit ataatsimoortillugit qaffassimapput; 23,3 millioninit 28,9 millioninut.

– Nammineq piumassutsimik sullissisarneq aamma timersornermut soqutiginninneq nunatsinni timersornermi tamarmi aalajangiisuuvoq. Naalakkersuisut isumaqarput pingaaruteqartoq nammineq piumassutsimik suliamik ingerlatsisut, soorlu sungiusaasut aamma aqutsisuusut, suli nukittorsarneqarnissaat, tamannalu qularnaarneqartassasoq GIF-ip immikkut kattuffinnut ataasiakkaanut ingerlateqqittagaasigut, Vivian Motzfeldt akissuteqarpoq.

Aaqqissuisut

Nunarput pillugu sammisaqarfik