Tilioq qineqqusaartunut allagaqarpoq

Peqatigiiffiit Inooqat, Landsforeningen Autisme, KNIPK, Sugisaq, Nuummi Gigtertut Peqatigiiffiat aamma Nanortalimmi Innarluutillit Peqatigiffiat suleqatigiillutik ullumi Inatsisartunut qineqqusaartunut allakkanik nassiussaqarput.

Allaffigineqartut tassaapput partiit tamarmik, nassiussisuuvorlu Innarluutillit illersuisoqarfiat, Tilioq.

Allakkami ilaatigut eqqaamaqquneqarpoq, kikkut tamarmik inuiaqatigiinni iluaqutaasutut nammaqataallutik misigitinnissaat pingaaruteqartoq aamma Kalaallit Nunaata siunissaa innuttaasunit tamanit pitsaasumik inuuffigineqarnissaa anguniarneqartariaqartoq.

– Kalaallit nunaanni inuit innarluutillit imaannaanngitsunik anguniagassanik inuiaqatigiit iluanni unammilligassaqarput. Kajumissaarumavassi unammilligassat akisussaassuseqartumik suliassatut tigoqqullugit. Inuit innarluutillit eqqartorneqaraangata imaanngilaq inunnik isumaginninnikkut politikki kisimi pineqartartoq, Tilioq allappoq.

– Inunngornermiilli inuttut innarluuteqartoqarsinnaavoq. Ataatsimut inunnut innarluutilinnut aaqqiissutissat iliniagaqarnikkut, suliffeqarnikkut tunngaviusumillu toqqammavissat patajaatsut eqqarsaatigineqartariaqarput. Isumaqarpugut, tamakku nalilersugassat pingaaruteqartut unammillernarsinnaasullu aaqqiiviginissaanut qanoq iliuuseqartariaqartusi. Nipangiutiinnakkat qulaajarlugit alloriarneq siulleq pimoorunneqartariaqarpoq, inuit innarluutillit inuiaqatigiit iluanni qanoq annertutigisumik tunniussisinnaanerat inuit ilisimasaqarfiginerulertariaqarmassuk, Tilioq nangilluni allappoq.

Naggataatigut politikkikkut suliaqarnermi eqqummaariffigineqartariaqartut taakkartorneqarput, oqaatigineqarluni Innarluutillit Illersuisuat taakkartorneqartut itisilernerullugit oqaloqateqarnissaminut piareersimasoq:

  • Kommuunimi sulisut suliassarpassuarnik isumaginnittussat ikippallaaqaat. Sullissisut ikippallaaneri peqqutigalugu meeqqat atugaannut tunngasut paasiniagassat sivisuallaartaqaat, inuillu innarluutillit ilaqutaanullu siunnersuineq ilitsersuinerlu naammaginanngilaq, ikiorneqanngitsutut immikkoortortaqarfinniit immikkoortortaqarfinnut allanut uteqattaajaartinneqartarnerat pisortat tungaaniit naammaginanngilaq. Kommuunit kisimiillutik ajornartorsiut aaqqiivigisinnaanngilaat. Kommuunit suliaat kivinneqassappata suli annertunerujussuarmik suliniuteqartoqartariaqarpoq.
  • Inuit innarluutillit ikiorlugillu ikorfartuisussat assaat kissalaartut ikippallaaqaat, ikorfartortillu inuit taarseraappaallaarlutillu ilinniarteqqinneqartarnerat amigarpallaarpoq. Assersuutigalugu ulloq unnuarlu paaqqinnittarfiit sulisussanik inuttassarsiuunneqaraangata taamaallaat affai ilinniarsimasunik sulisoqartarput. Tamanna naammaginanngilaq! Inuit innarluutillit sullinneqarnissaannut kajuminnarnerulersitsisoqartariaqarpoq, piginnaanngorsaaneq, ilinniartitseqqiineq sulisullu suliffimminnik aalaakkaasumik suliinnarsinnaanerat annertunerusumik qaffassartariaqarput, innuttaasummi ikiorserneqarlutik ikorfartorneqarnissamik pisinnaatitaaffeqarput.
  • Inuit innarluutillit pitsaanerusumik inissaqartinneqartariaqarput. Inuit innarluutillit massakkut najugaqarfigisaasa annerpaartai ajungaaramik isateriaannaapput. Tamanna akuersaarneqarsinnaanngilaq!
  • Meeqqat atuarfianni atuartut immikkut atuartinneqartartut suli amerlanerit atuarfik qimatsinnagu inaarutaasumik soraarummeersinneqartarnissaat  anguniarneqartariaqarpoq.

 

Aaqqissuisut

Nunarput pillugu sammisaqarfik

%d bloggers like this: