Taseralik ukiuni qulini

Sisimiuni kulturip illua, Taseralik, ukiut qulinngortorsiornerminut atatillugu marsip aallaqqaataani Nunatta Isiginnaartitsisarfia suleqatigalugu isiginnaartitsinermik ingerlatsissaaq.

Isiginnaartitsissutigineqassaaq “Akunnerit”, aallartissallunilu nalunaaqutaq 19:30. Aqaguani tallimanngornermi isiginnaagassiaq takuteqqinneqassaaq.

Unnunni taakkunani marlunni erinartoqatigiit, Crescendo GUX, appeqattaarumaarputtaaq.

Taseralik 2008-mi ammarneqaramili aningaasaqarniarnikkut unamminartorsiortuartarsimavoq, ukiullu ingerlanerini ileqqaarniarneq ingerlanneqartuartarsimavoq. 2012-mi Qeqqata Kommunia nammineq aningaasaatit pilersinniarlugit suleqataasimavoq, 2016-milu ukiumut tapiissutigineqartartut 486.000-nik qaffanneqarput. Maanna ukiumut tapiissutaasartut 3.898.000 koruuninik annertussuseqarput.

2016-mi takkuttut: 25.344. Aaqqissuussat: 354.
2015-mi takkuttut: 26.532. Aaqqissuussat: 364.