Susan Aglukark: Ajugaanngilatit

Nunavummi arnat niviarsiaqqallu periarfissaarunneqarsimasut pillugit, Rankin Inletimi ulluni makkunani tusarniaaneq ingerlanneqarpoq.

Tamanna sapaatip-akunnerani uani pivoq, tamanullu ammasumik Nunavummi tusarniaanerit tassatuassarivaat. Tusarniaanermi aniguisimasut ilaqutaallu oqaluttuartinneqarput.

Erinarsortartoq, Susan Aglukark, ilanngulluni oqaluttuarpoq, tassanilu arfineq-pingasunik ukioqartilluni angummit atornerlugaasimanini oqaluttuaralugu. Tamanna marlunngormat ualikkut pivoq. Taamak CBC North allappoq.

susan-aglukark
Susan Aglukark. Assiliisoq: Jared Delorme/APTN

– Ajugaanngilatit. Maannakkuunngitsoq, aamma qaqugorsuarmut. Maanna inuiaqatigiit ilisimalerpaat qanoq iliorsimanersutit. Ini manna atornerluiffigisimasannik ulikkaarsinnaavarput, Susan Aglukark atornerluisuminut, Norman Fordimut, toqqarluni oqarpoq.

Taamani pisoq pillugu eqqartuussivimmi nassuiaateqarnerata kingorna, aatsaat erinarsortartup pisoq oqaluttuareqqippaa. Atornerluineq 1980-kkunni pivoq, aatsaallu ukiut tallimangajaat qaangiummata eqqartuussivimmi suliarineqarluni aallartinneqarsimavoq.

​Aglukark oqarpoq Rankin Inletimi najugaqarfimminni angut taanna sanilerisimagitsik. Meeqqanik paarsaqartilluni Norman Fordip sianerfigalugu aggeqqusimavaa, oqarluni angajoqqaavinut tunissutissaqarluni.

– Iserama matu parnaarpaa, Susan Aglukark oqarpoq, nassuiarlugu ulloq manna tikillugu matup parnaarpalunera eqqaamasarlugu.

Oqaluttuarpoq sinittarfimmut isertissimagaanni, oqarluni tunissutissaq taqqamaniittoq. Tassani atornerlunneqarnera pisimavoq, Polaroidimillu assiliissutimik assiliortorneqarsimavoq.

– Polaroidit qinngaraakka, taanna oqarpoq.

– Ullumikkut sunilluunniit assiliortorsinnaavarma, kisianni Polaroidit naagga. Inuiaqatigiinni kina tatigaajuk?

Aglukarkip nassuiarpaa qanoq ajoqusernermik kingunerlutsitsineq ersertarnersoq. Timaa nusuttarpoq eqqissiveeruttarporlu. Niaqorluttarpoq aamma maluginngisaminik sivisuumik qanini salissinnaasarpaa. Isiginnaarneqartutut misigisarpoq. Akunnittarfinni unnuissagaanngami saagut saagoqqassapput matullu saavani allaruk inissisimassaaq.

– Qaamanermik isertoqarpoq, taassumap takusinnaavaanga, Susan Aglukark oqarpoq.

Nunavummi eqqartuussiviit taamaallaat qaammatit sisamat-arfinilikkaarlugit Rankin Inletimut takkuttarmata, pisoq pillugu taamani eqqartuussinissaq marloriarluni kinguartinneqartarsimavoq. Piffissap ingerlanerani atornerluisuni inuiaqatigiinnguani inooqatigisariaqarsimavaa.

– Inuiaqatigiinni kina tatigisinnaaviuk?, taanna aperivoq.

– Kina oqaloqatigisarpiuk? Kikkut tamarmik ilisarisimaqatigiipput.

Fordi qaammatini 18-ni parnaarussaasussatut eqqartuunneqarpoq, Susan Aglukarkillu saniatigut niviarsiaqqanik arlalinnik atornerluisarsimavoq. Pineqaatissinneqarnermi kingorna taamaallaat pineqaatissiissutip pingajorarterutaa parnaarussaassutigaa.

Katsorsaavissanut aningaasaliissuteqaritsi
Susan Aglukarkip erseqqissarpaa nalunngikkini, Norman Fordi Rankin Inletimi inunnut amerlasuunut pinerluttarsimasoq, aamma unnerluutigineqaqqilersoq nalunngikkini tusarnaartunut oqaluttuaraa.

Nassuiaateqarnini naggaserlugu Aglukarkip innersuussutigaa, Canadap avannaani eqqugaasut sullinneqarnerusariaqartut.

– Eqqorneqarsimasut ikiorneqaqqullutik sumut saaffiginnissinnaagamik, taanna aperivoq.

– Eqqugaasut ikiorneqartarnissaanut aningaasaliissuteqartariaqarpugut. Katsorsaaviit amerlanerit pisariaqartippavut – sumiiffiit tamarmik peqartariaqarput, Susan Aglukark naggasiivoq.

Aaqqissuisut

Nunarput pillugu sammisaqarfik

%d bloggers like this: