Ukioq manna Royal Greenland sulisussanik avataaneersunik 51-inik tikisitsigaluarpoq. Taakkuli naamaqqajanngitsut oqaatigineqarpoq. Assiliisoq: RG

Sulisussaaleqineq artukkiivoq

Royal Greenlandip massakkorpiaq sulisut 120-it amigaatigai. Sulisussaaleqineq avannaani tamarmi atuuppoq. Taamak RG allappoq.

Uummannami sulisussaaleqineq, nunaqarfiit ilanngullutik sulisussaaleqiffiuneranit sunnerneqarsimavoq. Saattuniit Ikerasanniillu aalisakkat suliareqqitassat Uummannamut arsartorneqartariaqartarput.

– Naak ulloq unnullu tunisassioraluarluta tamakkiisumik tunisassiussagutta sulisunik amerlanerusunik pisariaqartitsivugut. Sulisuvut aalajaatsut qaangiuttoorlutik sulisariaqartaramik artukkerneqarput. Qasulluinnarput, Uummannami fabrikip pisortaa, Kirsten Kristensen Worm oqarpoq.

– Suliffissarsiuussisarfik aqqutigalugu sulisussarsiortaraluarpugut aamma Kinamiunik, Skandinaviamiunik nunattalu Kangianiit sulisunik tikisitsinikuugaluarluta suli amigaateqaratta aalisartut tunisaannut malinnaanniapilooqaagut, Kirsten Kristensen Worm oqarpoq.

Taamaallaat Uummannami nunaqarfiinilu sulisunik amigaateqartoqanngilaq. Upernavimmi sulisussaaleqisoqarportaaq, aamma nunaqarfiit ilanngullugit. Taamatuttaaq Maniitsumi, Qasigiannguani, Ilulissani Qeqertanilu tunisassiorfiit sulisunik amigaateqarput.

– Naak Kinameersunik nordjobbertunillu avataaniit sulisussatsinnik tikisitsinikuugaluarluta, Maniitsumi ullut tamaasa sulisunik amigaateqartarpugut. Taamaattumik maanna sulisorisavut sulipiloorput, RG-mi tunisassialerinermut ingerlatsisoq, Sten Sørensen oqarpoq.

Royal Greenland ilanngullugu ilisimatitsivoq, sulisussat pissarsiarineqartaraluartut, kisianni kingorna arlallit takkuteqqinneq ajortut.

Ukioq manna Royal Greenland sulisussanik avataaneersunik 51-inik tikisitsigaluarpoq. Taakkuli naamaqqajanngitsut oqaatigineqarpoq.

Aaqqissuisut

Nunarput pillugu sammisaqarfik