Sulisitsisut RAL-imut sioorasaarisut

Royal Arctic Linep pisortaa, Verner Hammeken, Sulisitsisut peqatigalugit ualilluarnerani  Nuummi ataatsimeeqateqartussaassimagaluarpoq. Sulisitsisulli internetimi quppernerminni nalunaarput, RAL-ip pisortaa qaaqqusinermut atatillugu oqaluuserisassanut ajuallalluni peqataajumajunnaarsimasoq.

Sulisitsisut qaaqqusinerminni allassimapput, “Pisortaq Verner Hammeken, umiarsuaatileqatigiit periusissatut pilersaarutai pillugit ilisimatitsissasoq, aamma taakku pillugit apeqqutinut akissuteqartassasoq, aamma it-mut ataqatigiissitsiniarnermullu ajornartorsiutit suliffeqarfinnut naalliutsitsisut suliffeqarfinnullu arlalinnut annaasaqarnermik kinguneqarsimasut pillugit apeqqutinik akissuteqartassasoq”.

Sulisitsisut nangillutik allapput, soorunami taamak aaqqissuussinermut qaaqqusissut Royal Arctic Linemit akuerineqarsimatinnagu nassiussinnaanagu, kisianni anguniagaqartumik allannguutissanillu siunnersuutinik tunniussaqarani Verner Hammekeni ilisimatitsisoq, qaaqqusissummi allassimasut akuerisinnaanagit.

– Erseqqipportaaq Royal Arctic Line ataatsimiinnermut peqataasinnaanngitsoq, peqataanissaq illuinnarsiorluni eqqartuusserpalaartumillu tunngaveqartinneqassapput, Verner Hammeken Sulitsisunut allakkamini oqarpoq, nangillunilu:

– Ualilluarnerani oqaloqatigiinnissamut pilersaarusiorniarsarivugut ilaasortasi allannguinissat pillugit apeqquteqarsinnaaniassammata, aamma siunissaq pillugu oqaloqatigiinnissamut toqqammaviliisoqarniassammat. Taamakku pillugu atuisunut, Sulisitsisut RAL-ilu, misissuisitsisimapput aamma taanna toqqammavigalugu oqaloqatigiinneq ingerlakkusupparput, Verner Hammeken allappoq.

– Erseqqippoq tamanna siunertaralugu Sulisitsisut ataatsimeeqateqarnianngitsut. Taamaattumik aaqqissuussineq RAL-imit isumaqataaffigineqarunnaarpoq, Verner Hammeken nangilluni allappoq.

Sulisitsisut siulittaasuat, Henrik Leth, Verner Hammekenip pissusilersorneranut tupigusunnerarpoq. Taanna oqarpoq, Sulisitsisut sivisuumik naammagittarsimasut aamma Royal Arctic Linep it-nut ataqatigiissitsiniarnermullu ajornartorsiutaanut sivisusimasunut Sulisitsisut sualunngitsumik pissuseqarsimasut.

– Oqaloqatiginissarsi ajornartorsiornarpoq, ilaatigut siulersuisussi siulittaasuat internetikkut uatsinnut iperterisimavoq, aamma illit missingersuutitut titarnerit marlussuit qinnguummeerutigigukkit. Tamatta aaqqiissuteqartoqarnissaanik soqutigisaqarpugut, Henrik Leth allappoq nangillunilu:

– Taamaattumik illit piginnittunnut tusagassiuutinullu atatillugu malugeqqusaarnaveersaarsimavugut aamma oqaloqatigiinnissaq ujartorsimavarput. Kisianni nassuerutigissavara naammagittarnera killissaminut pilermat. Uanga kattuffinniit Sulisitsisullu ilaasortaaniit sakkortusaarfigineroqqullusi kimigiiserfigineqarpunga, Henrik Leth allappoq.

– Paasivara ingerlariaqqissinnaagunanngitsugut. Suliffeqarfik marloqiusamik oqaluttoq pivarput, tamannalu niaqunnut pulatikkuminaatsippara. Suliffeqarfiit ajunngitsumik ingerlanneqartut pineqartillugit tamakku sungiusimanngilavut, Henrik Leth naggasiivoq.

 

Aaqqissuisut

Nunarput pillugu sammisaqarfik

%d bloggers like this: