Suleqatigiissitsisut: Silaannalersuuterpassuit

Nammineq piumagutta nammineq aningaasaliissutissat nassaarisariaqarpagut. Aamma ullumimut naleqqiulluta akisussaanerusariaqassaagut – pisarialinnillu iluarsartuussilluta, aamma annernassagaluarpalluunniit Aningaasanut Inatsimmi allanngortiterilluta. Ingerlatsineq sipaarfigiumallugu ileqqaarlutalu piffissanut sussaaleqiffiusussanut, Suleqatigiissitsisut sinnerlugit Inatsisartunut qinigassanngortittoq, Tillie Martinussen allappoq.

– Ukiut sisamakkaarlugit paasilertarparput kingullermik killiffitsinnut naleqqiullugu ajornerusumik inissisimalersimalluta. Taamatut ingerlavugut ukiuni kingullerni 38-ni. Sikup sinaaniippugut taamaakkaluartoq eqqartukkani pingaarnersaatinneqarpoq Air Greenlandimik piginneqataassutsinik amerlanernik pisissanersugut. Sussaanngilluinnaqqissaarpoq, Tillie Martinussen anersaaruluppoq.

Taassumap ilanngullugu oqaatigaa, iluarsartuussinerit suamik suamik eqqaaneqartut aamma tigussaanngitsumik.

– Sanaartornissaraasiit eqqaaneqarpoq oqaatiginagu aningaasat suminngaanniit pissarsiarineqassanersut. Siunnersuuterpassuaqarpoq “suut  suliniutigineqarusunnersut” kisianni aningaasartassai eqqaaneqanngisaannarput, taanna oqarpoq.

– Politikerit niuertuusaartillugit piffissaq ungasinnerusoq isigalugu isumaqatigiissuteqartariaqarpugut – kisianni ataguli tamakkununnga pikkorissut suliseriartigit.

– Inuussutissarsiortut sutigut tamatigut aqukkunnaartariaqarpagut taarsiullugulu meerartagut siulliullugit sullisilerlugit. Aamma matchgruppi pingajuanniittut ikiornissaat, meeqqat atuarfiisa kivinneqarnissaat, meeqqat inuusuttullu navianartorsiortut ikiorneqarnissaat tamarmik sammineqanngikkunik iluarsinavianngillat, Tillie Martinussen oqarpoq.

– Maanna partiit pioreersut aningaasarsiornikkut aaqqissuusinikuunngilaat, iluarsartuussinikuunngillat malunnaatilimmik imaluunniit nutaanik isertitassanik Naalagaaffiup tapiissutaanik taarsiisinnaasunik nassaarnikuunngillat. Aamma ileqqaarnikuunngillat, piffissami aningaasarsiornikkut ingerlalluarfimmi illuartitsinikuunngillat aamma aaqqiissutissanik saqqummiussinikuunngillat.

– Aatsitassarsiornermit milliarterpassuit isertitassat utaqqinerini imaluunniit tupinnaannartumik aalisagaqarneruleriataarnissaata utaqqinerani, naviartorsiortutta meeqqallu atuarfiata aaqqiissutissat pitsaasut utaqqivaat, Tillie Martinussen oqarpoq.

– Naalagaaffeqatigiinni suleqatigiinnerunissamut siunnersuummut ullumi naaggaartoqarnera paasiuminaatsipparput. Imatut paasissanerlutigu partiit pioreersut iluarsartuussinissat pinngitsoorneqarsinnaanngitsut suliarerusulersimagaat isumaqatigiissusiorlutillu ukiuni 10-ni 20-ni atuuttussanik, allamiut aningaasaliisartut kalaallillu naatsorsuutigisinnaasaannik, taanna aperivoq.

 

Aaqqissuisut

Nunarput pillugu sammisaqarfik

%d bloggers like this: