Suleqatigiissitsisut: Kikkut kinguppannik pisassinneqassagamik

Partii Suleqatigiissitsisut oqarput, namminneq akerlerigitsik siornatigut pisassinneqartarsimasut salliutinneqarlutik pisassiissutinik arsaarinnissutaasimasunik pisassinneqartassappata.

– Assigiinnarpaa lottomi eqqukkat tigoriikkat tigoqqinneqalersut, partii tusagassiuutinut oqariartorpoq nangillunilu:

Demokraatit, Partii Naleraq, Inuit Ataqatigiit Siumullu aalisarnermut ataatsimiititaliami isumaqatigiittumi issiatitaqarput, taakku 2017-mi upernaakkut inatsisartut ataatsimiinneranni immikkoortoq 115 aappassaaneerneqarmat Naalakkersuisunut inassutigaat sinerissamut qanittumi avataanilu raajartassiissutit tamakkiisut agguaateqqinneqassasut, tassa avataasiortunut pisassiissutigineqarsimasut 57 procentit sinerissamullu qanittumi pisassiissutigineqarsimasut 43 procentit naligiimmik pisassiissutigineqartussanngorlugit – 50 procentit sinerissamut qanittumi taamatullu 50 procentit avataasiortunut.

Suleqatigiissitsisut isumaqataapput raajartassiissutit aalisartunut qaqogorsuarmut pigisassatut tunniunneqarneq ajormata. Pisassiissutit agguaateqqinneqarsinnaasariaqarput, kisianni allannguinissamut periarfissap sivisussusa ima sivisutigisariaqarpoq aalisartitseqatigiiffiit ataasiakkaat aningaasaliissutigisimasaminnut naapertuuttunik isertitaqarsinnaatillugit.

Aalisarnermut ataatsimiititaliaq isumaqatigiittoq siunnersuut aappassaaneerneqarmat isumaliutissiissummini ilaatigut ima allappoq: “Agguaassinermi tunngavik ukiunik tallimanik siumut nalunaaruteqareernikkut pissaaq.”

Partii oqarpoq, piffissaliunneqartoq sivikippallaartutut isigigitsik.

– Kilisaatit akilersorneqarajupput ukiut 20-t missaanni taamaattumik ukiut taakku akornanni sivisussusiliinissaq tulluassaaq, aamma siumut nalunaaruteqareernissaq sivikippallaarpat aalisartitseqatigiiffiit Namminersorlutik Oqartussat eqqartuussivimmut suliassanngortissagaat ilimagisariaqarpoq, taamallu pisoqassappat ajugaassapput, Michael Rosing oqarpoq.

– Agguaassinermi tunngavimmik allanngortitsisoqarpat aalisartut nutaat aalisalersinnaanissaat periarfissaalissaaq, tassungalu ilaatinneqassaaq pisassiissutinik peqarnikuusimasut tassunga atatillugu salliutinneqassammata, Michael Rosing oqarpoq, nangipporlu:

– Assigiinnarpaa angallatiga nuannaariartaat tunigiga kingornalu pisisoq arsaariarlugu tuneqqissinnaanngoriga.

– Isumaqarpunga oqalligineqarsinnaasariaqartoq pisassiissutit qanoq sivisutigisumik pigineqarsinnaassanersut. Pisassiissutit assersuunneqarsinnaapput akuersissutinut, soorlu taamaattoqartartoq kuut eqaloqarfiit takornarianut atortussanngortinneqaraanngata. Akuersissutit taakku ukiuni 20-ni 30-nilu atorsinnaakkajuttarput sivitsorneqarsinnaallutillu, Michael Rosing oqarpoq.

Naggataatigut Michael Rosingi erseqqissaavoq, nammineq taamani partiit taaneqartut ilaanni ilaasortaagami, taamalu isumaliutissiissummut pineqartumut saqqummiusseqataalluni.

– Demokraatit sinnerlugit saqqummiusseqataavunga, kisianni Demokraatiniit ilaasortaajunnaarninnut tamanna sakkortuumik pissutaaqataavoq, Michael Rosing oqarpoq.