Suka K. Frederiksenip EU oqaloqatigigaa

Naalakkersuisunut ilaasortaq, Suka K. Frederiksen, Bruxellesimi EU-p Nunanut Allanut suliaqarnermi Vice-Generalsekretæria, Christian Leffler, EU-p Issittoq pillugu politikkimi atorfilittat suliaqarnerinut akisussaanerpaasoq, ataatsimeeqatigaa.

Ataatsimiinnermi Kalaallit Nunaata soqutigisai eqqartorneqarput, tassungalu atatillugu Suka K. Frederiksenip ilannguppaa Kalaallit Nunaata EU-mik suleqateqarnini ingerlateqqissallugu soqutigisarigaa – ajornanngippallu suleqatigiissutigineqartut amerlisarnissaat nunatta kissaatigigaa.

EU-p Issittumi Politikkianut atatillugu 2017-mi Arctic Stakeholders Forum pilersinneqarpoq, tassanilu siunertaavoq EU-p Issittumi nunat sumiiffinniittut ilanngussivigisinnaasaannik aningaasalersuinissamut pingaarnersiuinissaa pillugu nalunaarusiornissaaq.

– Kalaallit Nunaanni Namminersorlutik Oqartussanit aallartitat inuussutissarsiornermillu ingerlatsisut nalunaarusiamut tassunga isumassanik tunniussaqarput, naalakkersuisoq Suka K. Frederiksen oqarpoq, nangillunilu: – Nalunaarusiaq ukiup aallartinnerani naammassineqartussaavoq, siunertaasorlu tassaavoq nalunaarusiami suliniutissatut aningaasalersuinissamullu pingaarnersiukkatut taakkartorneqartut peqataaffiginiarnissaat.

– Brexitimi killiffik ajornakusoortoq eqqartorneqartunut ilaavoq, tassanilu Kalaallit Nunaata aalisakkanik nioqqutissianik Tuluit Nunaannut pingaarutilimmik niueqateqarnera ilanngullugu eqqartorneqarluni. Tassami Tuluit Nunaat EU-mit kaanngassagaluarpat OCTA-mi (Overseas Countries and Territories Association, aaqq.) ilaasortat allanngoratarsinnaapput, amerlassusaat 22-niit 13-nut appariassammata. Tamannalu pisassat agguataarneqartarnerannut sunniuteqarsinnaavoq, Suka K. Frederiksen oqarpoq.

Aaqqissuisut

Nunarput pillugu sammisaqarfik

%d bloggers like this: