Soraarnerussutisiassat siumoortumik akileraaruserneqarnissaanut IA kisiartaalluni akerliusimasoq

2016-mi juunip arferngani Inatsisartut akuersissutigaat pensionisiassat siumoortumik akileraarusersorneqassasut. Ulluni makkunani inuppassuit utoqqalinissaminnut ileqqaakkatik qanoq akileraarusersorneqarsimanerat allagarsiaminni takusinnaanngorpaat.

Siumoortumik akileraarusersuineq tunngavilersorneqarpoq, utoqqalinermi tiguneranni akileraarusernagit massakkut akileraarusiineq ingerlanneqassasoq. Tunngaviusumillu tamanna isumaqarpoq, ileqqaakkat akileraaruserneqareersimanngikkaluarunik amerleriassutissarigaluat peerneqarmata.

Aamma atuarukNamminersorlutik Oqartussat tillikujuttut

Akileraartarnermut Aqutsisoqarfik nassuiaavoq, siumoortumik akileraarusersuineq aqqutigalugu ileqqaakkannik ilanngartuineq ilinnut sunniuteqarnavianngitsoq.

– Akileraarut soraarnerussutisiaqarnissamut akiliutigisannit tamarmiusuniit ilanngaatigineqassaaq. Tassa imaappoq soraarnerussutisiaqarnissamut nammineq akiliutitit aamma sulisitsisuit akiliutigisimasai, Aqutsisoqarfik allappoq nangillunilu:

– Siuartitamik akileraarusiineq taamaalilluni taamaallaat soraarnerussutisiaqarnissamut akiliutinnut tunngasuuvoq. Akissarsiat tigusatit taamaattumik allanngussanngillat, kisiannili soraarnerussutisiaqarnissamut akiliutitit annikinnerulissapput. Tamannali isumaqanngilaq soraarnerussutisianit tigusatit ikinnerulissasut, Aqutsisoqarfik allappoq.

Ikinnerulinnginnissaanullu tunngatillugu assersuutigineqartoq taamaallaat ukiut 30-it ingerlaneranni ileqqaaqqissimagaanni anguneqarsinnaavoq. Akileraartarnermut Aqutsisoqarfik nammineq assersuussiorpoq:

Assersuut 42 %-imik akileraarutissat ilanngaatiginerat Akiliineq, qaammammut Akiliineq, ukiumut Ukiut 30-it kingorna Ukiut 30-it kingorna, tigusat
01.01.2017 sioqqullugu Kr. 3.000 Kr. 36.000 Kr. 1.080.000 Kr. 626.400
01.01.2017 kingorna Kr. 1.740 Kr. 20.880 Kr. 626.400 Kr. 626.400

Kattuffiit ilaat pineqartoq pillugu politikerinut mianersoqqussuteqarlutik allapput. Tamakkununnga ilaavoq IMAK, taakkulu ilaatigut allapput:

“Naalakkersuinikkut sulialinnut ammasunik allagaqarnitsigut kissaatigaarput, soraarnerussutisiaqarnissamut aaqqissuussinernut Danmarkimiittunut/nunani allaniittunut akiliutit akileraasuserneqarnissaasa siuartinnissaat aarlerinartoqarneranik nalunaarutiginninnissarput, tassami inatsisip kingunissai suli sukumiisumik qulaajarneqanngimmata. […] Inatsisissatut siunnersuummi pineqarput Kalaallit Nunaanni akileraarutissanut ilanngaammik atuisut, soraarninngortussanngorlutilli allamut nuuttut, taavalu soraarnerussutisaqarnissamut namminneq ileqqaakkaminnik tigusinerminni Danmarkimi imaluunniit nunami allami akileraartartut. Matumanili naalakkersuinermik suliallit eqqaamaannassavaat sulinermik inuussutissarsiutilippassuit imaluunniit sivikinnerusumik sivisunerusumilluunniit ilinniagalippassuit, soraarninngoraangamik Nunatsinniiginnartartut, inatsisissatut siunnersuummi eqqugaasussaammata. […] Aap, nunatta karsia aningaasameerpoq, isumaqarpugulli naleqquttumik ileqquerissaartumillu pissusilersornissaq tuaviussamik inatsisiliorniarnermit tunulliutinneqartoq.”

Aamma atuarukUtoqqalinissannut ileqqaakkakka tiguneqarput

Inatsisartuni siunnersuutip siullermeerneqarnerata kingorna Aningaasaqarnermut Akileraartarnermullu Ataatsimiititaliap pineqartoq sammeqqippaat. Ataatsimiititaliami ilaasortaapput Jens Immanuelsen, Siumut (siulittaasoq), Sara Olsvig, Inuit Ataqatigiit (siulittaasup tullia), Steen Lynge, Atassut, Jess Svane, Siumut, Tillie Martinussen, Demokraatit, Peter Olsen, Inuit Ataqatigiit aamma Aqqaluaq B. Egede, Inuit Ataqatigiit.

Ataatsimiititaliap inassuteqaatai ikinnerussuteqartullu oqaaseqaataat makkuupput:

Aningaasagarnermut Akileraartarnermullu Ataatsimiititaliami amerlanerussuteqartut Siumup, Demokraatit Atassutillu ilaasortaatitaasa inassutigaat siunnersuut Inatsisartunit akuerineqassasoq.

Inuit Atagatigiit ilaasortaatitaasa ikinnerussuteqarluni oqaaseqaat imaattoq
saqqummiuppaat:

“Inuit Ataqatigiit isumaqarpugut suli qulaajagassaqartugut. Kattuffiit  attuumassuteqartut Sulisitsisut (GE), Atorfillit Kattuffiat (AK), Nunatsinnit Perorsaasut Kattuffiat (NPK), Peqqinnissaq Pillugu Kattuffiit (PPK) aamma Ilinniartitsisut Meeqqat Atuarfianneersut Kattuffiat (IMAK) ernummassutiminnik saqqummiussisut tusarnaarpavut kissaatigaarpullu inatsisissatuni siunnersuut itinerusumik qulaajarneqassasoq. Taamaammat Inuit Ataqatigiit isumaqarpugut siunnersuutip naammassineqarnissaa ukiamut kinguartinneqartariaqartoq ataatsimiititaliami sukumiinerusumik suliarinninnissaq naleqqutinngitsumillu aalajagiisoqannginnissaa siunertaralugu.”

“Tamanna tunngavigalugu Aningaasaqarnermut Akileraartarnermullu ataatsimiititaliami ikinnerussuteqartut Inuit Atagatigiit ilaasortaatitaasa inassutigaat siunnersuut Inatsisartunit itigartinneqassasoq.”

 

 

Aaqqissuisut

Nunarput pillugu sammisaqarfik

%d bloggers like this: