Assiliisoq: Harding University

Sooq oqaatsit marluk atorneqassasut Naalakkersuisut akisinnaanngilaat

Inatsisartunut ilasortaq Jens Napãtôk’ (PN), § 37 aqqutigalugu juunip 18-ani Naalakkersuisunut apeqquteqarpoq, suna inatsit imaluunniit peqqussut toqqammavigalugu Inatsisartut  aalajangiiffigisassatut siunnersuutaat, allannguutissatut siunnersuutaat, nassuiaateqaqqusissutit,  apeqquteqaat aallaavigalugit oqallinnerit aamma Naalakkersuisunut apeqqutit oqaatsit marluk atorlugit tunniunneqartassanersut.

– Pisortat suliffeqarfiutaasa aamma Kommunit allaffiini nutserisitsisarneq aamma oqalutseqartarneq ukiuni 2009–2016 qanoq aningaasanngorlugu annertutigaa, ilanngullugu Napãtôk’ aperivoq.

Naalakkersuisoq Pele Broberg (PN) akivoq, apeqqut akisinnaanagu.

– Apeqqut Inatsisartut Siulittaasoqarfiata suliassaqarfianut attuumassuteqarpoq, taamaalillunilu akissuteqarfigineqarnissaa § 37 naapertorlugu apeqqutinut tunngavissarititat avataanniippoq, Naalakkersuisoq akissuteqarpoq.

Naalakkersuisoqarfinnut apeqqutigigatsigu, ilumut inatsisitigut tunngavissaqartoqannginnersoq, paasivarput ‘taamaallaat’ 2000-p siornatigut allaffissornerup iluani nalunaaruteqartoqarsimasoq, oqaatsit atorneqartut naapertorlugit akissuteqartoqartassasoq, aamma nutserisariaqartarneq Inatsisartut Siulittaasoqarfiata nammineq piumasaqaatigigaa.

Politikerisut pinngitsoorani oqaatsit marluk atorlugit allattoqartarnissaanut tunngatillugu inatsisitigut toqqammavissaqartoqarnersoq taamaalilluni Inatsisartut Siulittaasoqarfianut ingerlateqqinneqarpoq.

Ukiut ingerlanerini nutserinermut aningaasartuutsit ilisimaneqartut (mio. kr.). Assiliortoq: Namminersorlutik Oqartussat

Nutserinerit qanoq akeqarnerannut tunngatillugu Naalakkersuisut akipput, kisitsisini taamaallaat ilaatinneqartut aningaasartuutit naatsorsorneqarsimasut.

– Aningaasartuutiviit annertunerusinnaapput, tassa sulisut allat nutserisuunngitsut pisut ilaanni nutsigassanik aamma ingerlataqarsinnaammata. Taakku nalingi nalunaarsorneqarneq ajorput, Pele Broberg allappoq.

Aaqqissuisut

Nunarput pillugu sammisaqarfik