Skating Babushka!

Nunarput tusagassaqartitsinermini suli kangimut appakaakkiartorpoq, inuillu uatsitut atugaqakannersut allaaserisarniarnerini Russit Nunarujussuat aqqutigalugu Chukotkamut apuukkiartuaarpugut. Aqqutaanni naapipparput Skating Babushka!

Nunarsuarmi tatsit itinersaata, Baikalip, qerrusimanerani ningiuusoq 76-nik ukiulik saarlisaarutinik sorsunnersuup aappaata nalaanneersunik saarlisaaruserluni sukkalisaarpoq. Ateqarpoq Lyubov Morekhodova.

Utoqqalinersiutisiaqalersimagaluarpoq, kisianni nersutaatini illuminiit ungasillivallaarsimagaanngata takusartariaqartarpai. Taamaaliussagaanngamilu saarlisaarusertariaqartarpoq.

Saarlisaarutai 1943-mi sananeqarsimapput, sulilu atorluarneqarsinnaapput.

Lyubovi tatsip eqqaani, illoqarfimmi Shara-Togotimi inunngorsimavoq, ataataa Nikolay orpippassualerisuusimavoq anaanaalu Fiona meeqqanik arfineq-marlunnik perortitsisimavoq. Lyubovip nunani asavaa, aamma aqqa, Lyubov, isumaqarpoq ‘asanninneq’.

– Saarlisaarlunga sumorujussuaq pisarpunga. Arfineq-marlunnik ukioqarlungali saarlisaartalerpunga. Taamani ataatama saarlisaarutissannik sanaappaannga, Lyubovi oqarpoq.

– Saarlisaarutit nutaaliat nuannarinngilakka, tassami singernernut annernartarput aamma nillertaqaat. Uanga pikka kissalaartuartuupput singerniiarnanngillallu, Lyubov oqarpoq.

Taanna ukiuni 42-ni Irkutskimi suliffissuarmi ingeniøritut sulisimavoq, kingornalu soraarninngorami uini ilagalugu ilaqutariit illuannut utersimalluni. Uia 2011-mi toqukkut qimagussimavoq.

– Igaffimmi kisimiillunga silammut isigisarpunga. Ingillunga una isigisarpara, taanna oqarpoq Baikalilu tikkuarlugu.

– Nuannaarnermik tunisarpaannga, aamma eqqarsartarpunga isikkiviga allat takusuuppassuk oqassasut; kusanassusia, ilumullumi kusanarluinnassusia, Lyubov oqarpoq.

Lyubovi sisamanik qimmeqarpoq, marlunnik qitsuuteqarpoq, marlunnik kukkukuujuteqarpoq, sisamanik nersutaateqarpoq marlunnillu angutikuluuteqarluni.

Erneri erngutaalu aasaraanngat takkuttarput.

– Nuna manna eqqissisimanartuuvoq. Perulluliortutuatut takusartakkakka tassaapput takornarissat ATV-nik atortulerlutik tamani tamaani nipiliortut, taanna oqarpoq.

 

 

This slideshow requires JavaScript.

The Siberian Times qutsavigaarput