Siulittaasut qinersineriunnaarpaat

AAQQISSUISUT. Ippassaq qinersineq arlalinnik maluginiagassaqarpoq, pingasullu erseqqinnerusutut inissisimapput.

Siullertut nunarput ataatsimut qinersivinngortinneqarmalli qinigaanerpaasarsimasut tassaasarsimapput partiit siulittaasui – kina siulittaasuunersoq apeqqutaatinnagu. Taamaakkami aamma qinersisarnerput “præsidentinngorniuttoqarneranut” assersuuneqartalersimagaluarpoq. Tamannali sakkukillivoq. Partiit annerit marluk, Siumut aamma Inuit Ataqatigiit, siulittaasui tamarmik qinersisuminnik affaannanngortitsipput.

Nunatta ataatsimut qinersiviunera sungiutilersimagunarparput. Tamannalu immini ajunngitsumik ineriartornertut taasariaqarpoq. Tassami qinersivik ataasiugaluartoq nammineq sumiiffimmi aallaavigisavut ilanngullugit salliunniarnissaat assinganik pingaartigaaq.

Aappaattut partiit angisuut marluk tamarmik qinersisuminnik annertuumik annaasaqarput. Taannarpiaq eqqarsaatigalugu Namminersornerulerneq eqqunneqarmalli aatsaat taamak erseqqitsigisumik allannguilerneq takutinneqarunarpoq; partiimut aalajangersimasumut pituttorsimasutut pissuseqarnerput qimakkiartorneqalersoq. Tassa partii uumasuunngitsoq, taamaallaalli annermik pappialamut siunertalersuisimanikkut atuuffeqartoq, taakkulu ujaqqamut kigartukkatut pissuseqanngitsut.

Pingajuattut “tungujortut” assigiinngisitaarlutik unammillersinnaalersimapput. Qanga Atassut qinersisoqarujussuaraluarmat Naalagaaffeqatigiinnermut tunngatinneqarnerusarpoq. Maanna Atassut, Demokraatit aamma Suleqatigiissitsisut “tungujortuunertik” aallaaviginerullugu ataatsimut 42,4 procentinik qinerneqarput. Siusinnerusukkut “tungujortut” iluatsitsilluarnerpaagaangamik 30 procentit missaanik qinersisoqartarput.

Aaqqissuisut

Nunarput pillugu sammisaqarfik

%d bloggers like this: