Lana Hansen ‘Sila’ nassarlugu Kinamut angalanialersaarpoq.

Sila Kinamut

Nukappiaraq tuluganngorsinnaasoq Kinamut angalanialersaarpoq.

Atuakkiortua, Lana Hansen, oqaluttuanik tunniussaqariartoqqullugu Beijingimut qaaqquneqarsimavoq. Qaaqqusisuuvoq Kinami atuakkiortut peqatigiiffiat, Chinese Writers Association.

Sila

– Aaqqissuussineq septembarimi pissaaq, Beijingimilu atuakkianut katersugaasivissuarmi ingerlanneqassaaq. Kinamiut atugaq assut soqutigaat, aamma immikkut saqqumilaartikkusuppaat, Lana Hansen oqarpoq.

– Kinamiut najuunnera tamaat akilissavaat, kisianni angalanera nammineq aningaasassarsiortariaqassavara, aamma katersuiniarlunga aallartippunga, Lana Hansen tulluussimaarluni oqarpoq.

Atuagaq Kinamiusut saqqummersinneqarnissaa pilersaarutinut ilaatinneqartoq oqaatigineqarpoq.

– Taamaalilluni Kinamiut meerartaaq issittoq pillugu nuannersumik paasisimasaqarnerulersinnaapput, Lana Hansen oqarpoq.

Atuagaq pillugu
Nukappiaraq Tulugaq’mik atilik atuakatalersimalluni, nammineq tulukkatut aarsaarluni takorluuerujuulerpoq. Sermersuup anersaava naapippaa, taassumalu Tulugaq aperivaa ikiuisinnaannginnersoq; pinngortitaq mingutsinneqarsimavoq aamma silaannaap kiatsikkiartornerata sunniutai iliuuseqarfigisinnaannginnerai. Paasisassarsioriarluni aallartitaavoq – nannumut, nattoralimmut, arfermut uumasunullu allanut, uumasullu taakku tamarmik Tulukkamut piginnaanermik tunniussipput, kingorna Sassuma Arnaanut tunniussassaanik. Tassami kalaallit oqaluttuatoqaataat malillugit, Sassuma Arnaa tassaammat eqqarsaqqaarani iliortoqarsimatillugu atuipiluttoqarsimatillugulu saammarsagassaq.

Sila oqaluttualiaavoq nutaaliaq allanartorlu meeqqanut 8-12-nut tulluartoq, oqaluttuallu kalaallit oqaluttuatoqaataat inuillu pinngortitamut isiginnittariaasiat naapertorlugit, silaannaap allanngoriartorneranut atassusiipput.

Sila 2010-mi Avannaamioqatigiit killiit meeqqanut inuusuttunullu atuakkiortunut nersornaasiuttagaannut innersuunneqarpoq.

Qallunaat Kinamiullu atuakkiortuisa Danmarkimi naapinneranni Lana Hansen peqataavoq. Assiliisoq: Dansk Kulturinstitut

Aaqqissuisut

Nunarput pillugu sammisaqarfik