Eimskipip umiarsuaataasa ilaat, Lagarfoss.

Samherjip Eimskip ilaa pisiaraa

Islandimi aalisarnermik ingerlatsisoq Samherji, umiarsuaatileqatigiiffiup Eimskipip piginneqatigiissutaanik 25 procentinik pisivoq, taakkulu 660 millionit koruunit missaanik akeqarput.

Taamaalilluni Samherji piginnittuuninngorpoq, Eimskipimi piginneqatigiissutit 25,3 procentii tigummisarilerlugit.

Eimskip 22-nik umiarsuaateqarpoq, nunani 20-ni assartuisarpoq 1.850-inillu sulisoqarpoq.

Samherjip pisortaa, Þorsteinn Már Baldvinsson oqarpoq, nammineq suliffeqarfitsik aamma Eimskip assingusumik suliaqartut.

– Eimskip tassaavoq nunarsuaq tamakkerlugu nioqqutissanik assartuilluni ingerlatsisoq, aamma Atlantikup Avannaanni sullissineq ajunnginnerpaaq anguniarneqartuarpoq. Umiarsuarnik ingerlatsineq uaguttaaq sungiusimalluarparput, aamma nunarsuarmioqatigiit akornanni niuerneq ilanngullugu, Þorsteinn Már Baldvinsson oqarpoq.

– Unamminassaaq, kisianni aappaatigut suliffeqarfiup ineriartorteqqinnissaa qilanaaraarput, aamma piginneqatigisavut allat peqatigalugit. Eimskip isumannaatsumik ingerlanneqarpoq, aamma sulisorissaarlunilu pisortaqarnermigut tatiginartumik inissisimavoq, Þorsteinn Már Baldvinsson oqarpoq.

Piginneqatigiissutinik tunisisoq tassaavoq aningaasaliisarluni ingerlatsivik, Yucaipa.

Yucaipa Companies tassaavoq Amerikami piginneqatigiissutinik pisillunilu tuniniaaqqittarfik, 1986-imi aallartinneqarsimasoq. Nalinginnarmik aningaasaliissutigisartagaat tassaapput $25–$300 millionit, taakkunannga $300–$500 millionit utertittarlugit.

Aaqqissuisut

Nunarput pillugu sammisaqarfik