Saattuni tunisassiorfik allilerneqalersoq

Uummannap pigisaanni Saattuni tunisassiorfiup qerititsivia allilerneqalerpoq, tunisassiorfillu qaammatini pingasuni tamanna pissutigalugu uninngagallassaaq. Tunisassiorfik aggustip aallaqqaataanni matugallarneqassaaq, tunisassioqqilerunilu pingasoriaammik naammassisaqarsinnaanngussaaq.

Saattuni sulisussaaleqisoqarneq ilanngulluni atorneqarmat, sulisut arfineq-pingasut inissaanik katitertakkanik inissialiortoqassasoq, ilanngullugu Royal Greenlandip nalunaarutigaa.

– Nutarterinerup kingunerisaanik pingasoriaammik tunisassiortoqarsinnaalissaaq, taamalu ulloq unnuarlu 15 tonsit missaannik tunisassiortoqarsinnaalissalluni. Maanna 5 tonsit tunisassiarineqartarput, Niels Ole Møller qaleralerinermik ingerlatsisoq oqarpoq.

Saattuni tunisassiorfiup annertusarneqarnissaanut pissutaasut ilagaat, Nuugaatsiami siorna juunip qaammataani tassaarsuarneqarneragut RG ilanngulluni illuutinik annaasaqarmat.

Saattut ilanngulluni sulisussanik amigaateqarfiummat inissialiat sulisunut tikisitanut atugassiaassapput.

– Sulisorisavut angutit aalisarsinnaanermut allagartartaarlutik aalisartunngormata sulisussaaleqilerpugut. Sulisuvullu aalajaatsut ukioqqortusisut inuusunnernik taarserneqarneq ajormata, allatuulli sulisussaaleqiffiusuni avataaneersunik sulisussarsiortariaqarpugut, Niels Ole Møller oqarpoq.

Saattuni sulisut sanaartornerup nalaani Uummannap tunisassiorfiani sulinissaannut neqeroorfigineqartut, RG ilisimatitsivoq.