Saamit meeqqanut atuakkiaat perngaamik innersuunneqartoq

Nordisk Rådip (Avannaamioqatigiinni Ministerit siunnersuisoqatigiiffiat) inuusuttunut meeqqanullu atuakkianik nersornaasiisarnerani, maanna perngarluni Saamit meeqqanut atuakkiaat nersornaaserneqartussatut innersuunneqarsimavoq.

tuttunik_paarsisunnguaq
~Tuttunik paarsisoq ilakkuminartunnguaq.

Atuakkiortorlu eqqarsaatigineqarsimagami tulluussimaarpoq.

– Iluarpoq, aamma atuakkiama taamak tiguneqarnera tulluussimaarutigaara. Piukkunneqarneq nuannerpoq, Anne-Grethe Leine Bientie, Snåsami najugalik, NRK Sápmimut oqarpoq.

Inuusuttunut meeqqanullu atuakkiat katillugit 13-t piukkunneqarsimapput, tamakkununngalu ilaavoq Anne-Grethe Leine Bientiep atuakkiaa, “Joekoen sjïehteles ryöjnesjæjja” (tuttunik paarsisoq ilakkuminartunnguaq, aaqq.).

Atuakkami oqaluttuarineqarpoq tuttunik paarsisoq “Jaahke”, iluatsitsinerliorluni qaqqani kisimiittussanngortoq, qanorlu Jaahke akisussaaffimmik tigusinersoq.

Nersorneqarnerup saniatigut ajugaasoq 350.000 koruuninik akissarsitinneqartarpoq.