Saamit filmiliaat streamerneqarsinnaanngortut

Saamit filmiliaat interneti aqqutigalugu isiginnaarneqarsinnaanngorput, filmillu siullermik Norgemi, Sverigemi Finlandimilu najugalinnit isiginnaarneqarsinnaapput. Saamit filmiliaat ataatsimut katersorniarlugit Internasjonal Samisk Filminstituttip suliniut ingerlassimavaa.

– Malugisimavarput saamit filmiliaanik isiginnaarusuttoqartaraluarluni periarfissaalatsisoqartartoq. Suliniutigineqartumilu pingaartinneqarnerulluni anguniagaavoq ajornanngitsunnguamik periarfissiinissaq, taamalu streamingi atorlugu inuppassuarnut periarfissiinissaq, Internasjonal Samisk Filminstituttip pisortaa, Anne Lajla Utsi, Norgemi ‘NRK Sápmi’-mut oqarpoq.

Taanna oqarpoq filmit katersukkat amerliartortinneqassasut, aamma filmit nunat inoqqaavinut tunngassuteqartut ilanngunneqartalerumaartut.

Sapaatip-akunnerani kingullermi Norgip avannaani illoqarfimmi Kautokeinomi nunat inoqqaavisa filmiliaat pillugit ataatsimeersuartoqarnerani suliniut saqqummiunneqarpoq.

– Pissanganarpoq takussallugu kiffartuussivik siunissami qanoq tigulluartigineqarumaarnersoq, Anne Lajla Utsi oqarpoq.

International Sámi Film Institute alakkaruk.