Russit 2018 ilanngullugu EU mattusimassavaat

Kalaallit Nunaanni aalisarnermut sunniuteqartartut amerlapput. Nunarsuarmi niuerfissat qanoq periarfissagissaartiginerat tamakkununnga ilaapput. Russit 2018-i naallugu EU-mik mattussimanninnerminnik nangitsissapput.

Russit præsidentiat, Vladimir Putin siorna peqqusivoq, EU-miit nioqqutissanik eqqusseqqusinnginneq 2018-ni naallugu atuutsissasoq. Peqqusineq akissuteqarneruvoq, pineqartorlu tassaavoq Ukrainemi pissutsit pillugit EU, Russit Nunaanniit nioqqutissanik eqqusseqqusiunnaarnerminik assinganik sivitsuimmat. Eqquteqqusaanngitsunut ilaapput naatsiiat, neqit, aalisakkat aamma nerisassat immummik sanaat.

Nioqqutissanik eqqusseqqusiunnaarneq nunanut EU-p avataaniittunut ammaassinertut paasineqarsinnaavoq, tassami EU-p sinneranit unammillerteqaratik niuernissamik periarfissinneqarput.

Atlantikup avannaa eqqarsaatigissagaanni Savalimmiut aamma Kalaallit Nunaat EU-p avataaniittutut suli Russit Nunaannut niuernissamut ammatitsiffigineqarput.

Naalagaaffiit Peqatigiit nerisassanut malinnaaqqissaartua, FAO, ilisimatitsivoq, Russit Nunaata avaleraasartuunik (makrelinik) qerisunik eqqussuinera 25 procentimik qaffariarsimasoq, 2017-illu qaammataasa arfineq-sisamat siulliit ingerlaneranni 66.900 tonsit eqqunneqarsimasut.

Russit Nunaannut niueqateqarnerpaat tassaapput Savalimmiut (39.200 tons), Kalaallit Nunaat (12.300 tons) aamma Kina (7.700 tons).

 

 

Aaqqissuisut

Nunarput pillugu sammisaqarfik

%d bloggers like this: