RAL-i akissuteqartariaqartutut misigisimasoq

Piffissami kingullermi Royal Arctic Line pillugu niuertut nioqqutissiortullu suliffeqarfimmut isornartorsiuisarnerat pillugit, maanna suliffeqarfik akissuteqartariaqartutut misigisimalersimavoq.

Taamak siulersuisunut siulittaasoq, Kuno Fencker, aamma pisortaq, Verner Hammeken, tusagassiuutinut nalunaaruteqarlutik allapput.

Oqallinneq pilerpoq Atuagagdliutit aqqutigalugu inuussutissarsiortut arlaqartut isornartorsiuereersullu, aamma Randi V. Evaldseni (D) facebookikkut allagaqarluni Kim Kielsenimut umiarsuaatileqatigiiffiup torersaavigineqarnissaanik piumasaqareersorlu.

– Isornartorsiuineq ingerlatsinitsinnut naleqqiullugu tunngavissaqanngilaq, taakku allapput nangillutillu:

– Isumaqarpugut Royal Arctic Linemi allanngortiterinerit Kalaallit Nunaannut pingaaruteqartut. Isornartorsiuinerillu tunngavissaqarsorinngilavut. Naalakkersuisut Inatsisartullu paasissutissiilluta nassuiaateqartarnertinnut takkuttartut pitsaasumik suliamut tunngatillugu oqaloqatigisarpavut, Kuno Fencker aamma Verner Hammeken allapput.

Royal Arctic Linep ilanngullugu erseqqissarpaa, allannguinernik annertuunik suliaqarnerminnut atatillugu, imaatigut assartuinerit siunissamut ungasissumut qulakkeerinnittussanngorlugit inissinniarsarigitsik, avammullu nioqquteqarnermut aamma pilersuinermut sapinngisamik pitsaanerpaamik iluaqutaasussamik suliaqarniarsaralutik.

Kisianni taamak suliaqarniarneq niuertut nioqqutissiortullu arlallit iluarinngikkaat kingullertigut tusagassiorfinni sammineqartarpoq. Tamannali suliffeqarfiup pissutissaqarnerarpaa:

– Aaqqissuusseqqinnermik suliaqassagaanni, taava aallartisarnermi sorpassuit piareersimasariaqarput aamma piffissaq sivisooq atuuttussaassutut naatsorsuutigineqarput. Suliassaq oqimaappoq, aamma qeqqinnaanni uniinnartoqarsinnaanngilaq, Kuno Fencker aamma Verner Hammeken allapput.

 

Aaqqissuisut

Nunarput pillugu sammisaqarfik

%d bloggers like this: