The Airbus BelugaXL, 'qilalugaq'. Assiliisoq: Airbus

Qilalugaq qaqortaq timmivoq

Beluga, Airbusip assartuutsitut timmisartuliarsuat, ippassaq juulip 19-ani timmeqqaarpoq. Tamanna Frankrigimi Toulouse-Blagnac Airportimiit pivoq. Akunnerit sisamat misiliutigalugu timmereerluni mittarfimmut uterpoq.

Timmisartoq alla, A330-mik taaguutilik nalinginnarmillu inunnik angallassisartoq, allanngortiterlugu Beluga XL sananeqarsimavoq. Atuuffissaa tassaavoq Europami Airbusip timmisartunut fabrikiisa assigiinngitsut akornanni atortussanik assartuisarnissaq. Unalu timmisartoq sulunnik usisinnaanngorlugu sananeqarsimavoq.

Timmisartoq qilalukkamut qaqortamut assingunera pissutigalugu Belugamik taaguuteqarpoq, qilalugaq taanna tuluttut Beluga Whalemik taaguuteqarmat.

Timmisartoq 50 tonsinik usisinnaavoq, 4.000 kilometerinillu isorartutigisumut timmisinnaalluni. Aallarnermini nalinginnarmik 227 tonsinik oqimaassuseqartarpoq.

Qanoq qalipaasersorneqarnissaa inuit 20.000-t apersorneqareersut aalajangiunneqarsimavoq, tassalu qilalugaq qaqortaq.

Aaqqissuisut

Nunarput pillugu sammisaqarfik