Qeqertarsuarmut umimmannik eqqussinissaq akuerineqarallartoq

Kommune Qeqertalimmi qinikkat maajip 31-ani ataatsimiikkamik, Qeqertarsuarni umimmannik eqqussisoqarnissaanik siunnersuut oqaluuseraat. Siunnersuuteqartuuvoq Jess Svane (S).

Taanna Qeqertarsuup nunataani umimmaliisinnaanermut periarfissat misissorneqarnissaanik siunnersuuteqarsimavoq. Misissugassatut siunnersuutigineqarpoq umimmaliissagaanni kikkut suleqatigineqassanersut aamma suut pinngortitamut akornutaasinnaasutut ilisimaneqarnersut.

Oqaluuserisassaq sioqqullugu misissuigallarnerup takutissimavaa, uumasunik naasunillu eqqussineq naggataatigut Namminersorlutik Oqartussanit akuersissutigineqartussaassasoq, ilaatigut pinngortitamut inatsit assigiinngitsutigut mianersornissamut piumasaqaateqarnera pissutigalugu.

1993-imi taamani Qeqertarsuup kommuniani aqutsisut Qeqertarsuarmi umimmaliisoqarnissaanut misissuinissamut aningaasaliisimapput. Misissuineq taanna inernilerneqarpoq, Qeqertarsuaq umimmaqarnissaminut tulluanngitsoq. Tassani tunngavilersuutigineqarpoq umimmaat nerisartagaasa ilaat ivigaq, latinerisut Kobresiamik taaguuteqartoq, Qeqertarsuarmi nassaassaanngimmat.

Kommunimi allattoqarfiup oqaluuserisassamut tunngavilersuutigaa, Qeqertarsuarmi umimmaliisoqarnissaanut akuersisoqassappat kingunerisinnaassai arlaqarsinnaassut. Tunngavilersuutit naapertorlugit tamakkua ilagaat, Kommune Qeqertalimmi umimmanniarfiusinnaasut amerlineri, aamma Arktisk Stationimi ilisimatusarneq eqqarsaatigalugu umimmaat qaninnerullugit Kommune Qeqertalimmi ilisimatusartoqarsinnaanera ammaanneqassasoq. Taamaattoq eqqarsarnartoqartinneqarpoq Qeqertarsuarmi pinngortitap allanngoriartulersinnaanera, pingaartumik naasut qaqutigoortut eqqarsaatigalugit.

Umimmannik Qeqertarsuarmut eqqussinissamut siunnersuutip suliareqqinneqarnissaa amerlanerussuteqartunit akuersissutigineqarpoq (8), ikinnerussuteqartut itigartitsisut (7).

Taamaalilluni Qeqertarsuup nunataani umimmaliinissaq misissorneqarluni ingerlateqqinneqassaaq, aamma aningaasartuutaasinnaasut qanoq annertussuseqarnissaanut missingersuutissat allattoqarfimmit ingerlanneqarsinnaalerput.

Pineqartoq soqutigigukku uani sukumiinerusumik paasisassarsiorsinnaavutit: https://www.qeqertalik.gl/

__
Assi: Smithsonian Magazine