Qanoq isummertoqarnissaa eqqanaareerlugu tusagassiorneq qasunarsivoq

Kujallermi Atassut sinnerlugu qinigassanngortittoq, Bentiaraq Ottosen, KNR-imut qatsussisimavoq.

– Tamanut eqqortumik paasissutissiissoqartariaqalerpoq, aamma pissutsit piviusut tunngavigalugit tusagassiuutit ingerlanneqartariaqarput, aamma tusagassiuutit inunnut isummertitsereernissaq suliassarinngilaat, Bentiaraq Ottosen nunarput.gl-mut oqarpoq.

Taassumap qisuariarneranut pissutaavoq, ippassaq Qanoruummi tusagassiortup apersuiitigaluni qeqqinnakkut oqarmat, Qaqortumi mittarfimmik sanaartortoqassappat Narsarsuaq matuneqassasoq.

– Uanga taamak Inatsisartut aalajangersimaneranik tusagaqarsimanngilanga, aamma apersorneqartugut taamak oqariartuuteqanngilagut. Nunaqarfinnik matusisoqassappat qularinngilara tamanna Inatsisartuni kommuninilu sukumiisumik eqqartuereernikkut aaqqiissutissanillu nassaarsioreernikkut pissasoq, Bentiaraq Ottosen oqarpoq.

– Ippassaq apersorneqarnitsinni Narsarsuaq pineqanngilq, aamma Atassummiit matusinissamik eqqartuinngilagut, Bentiaraq oqarpoq.

Taanna nangilluni erseqqissaavoq, inuiaqatigiit toqqissisimasut pilersinneqassappata isumaqarluni eqqortuusoq tusagassiutigineqartariaqartoq, aamma tamanna tusagassiorfiit paasisariaqaleraat.

– Nunatsinni angallanneq kipiluttunartorujussuusoq aamma inuiaqatigiinni angallannikkut kiffartuusineq pitsaanerusoq tunniutissagutsigu pinngitsoorata inuiaqatigiit akornanni ullutsinnut naleqqusaajuartariaqarpugut, Bentiaraq oqarpoq.

– Tusagassiuisussat pusingasumik isummersullattaarlutillu tusagassiortarnerat naammaleraluarpoq, Bentiaraq Ottosen oqarpoq.

 

Aaqqissuisut

Nunarput pillugu sammisaqarfik

%d bloggers like this: