Puigdemontip pisinnaatitaaffii Spaniap unioqqutippai

Taamak Carles Puigdemontip eqqartuussissuserisua Naalagaaffiit Peqatigiiffiannut ippassaq oqariartorpoq.

Naalagaaffiit Peqatigiit iluanni Inuit pisinnaatitaaffii pillugit ataatsimiititaliaq oqarpoq, Cataloniami siuttunut Spania “pinerlussimasunngortitsiniartoq”.

Carles Puigdemont, Cataloniami præsidentiusimasoq namminersulernermillu suaaruteqaqataasimasoq nammineq oqarpoq, inuttut politikkikkullu pisinnaatitaaffini Spaniap unioqqutillugit, Belgiami qimaasutut nunasisussanngortissimagaanni. Taamak The Guardian allappoq.

Naalagaaffiit Peqatigiiffiannut oqariartuut 37-nik qupperneqarpoq, tassanilu Spaniami naalakkersuisut unnerluutigineqarput, namminersulernianik malersuiniartutut aamma politikkikkut suliaqartunik, Cataloniamilu naalakkersuisuusimasunik parnaarussaqalersimasutut.

Puigdemont sisamanngormat oqariartorpoq, nammineq Cataloniami præsidentitut iverteqqinneqarnissi tunussimagini, taamallu aalajangerneq eqqartuussiveqarfitsigut malesorniarneqarneranik pissuteqartoq.

Naalagaaffiit Peqatigiiffiannut tunniunneqartumi ilaatigut allassimavoq, inuit kiffaanngissuseqarlutik katersuussinnaanerat oqaaseqarsinnaanerallu innarlerneqartoq, taamalu inuit pisinnaatitaaffiinik tamanna unioqqutitsinerusoq.

– Spaniami naalakkersuisut aamma eqqartuussisoqarfiit iliornerat, præsidentitut qinerneqarsimasup suliaminik aallussisinnaanissaanut mattussivoq, ataatsimiititaliaq tunngavilersuivoq.

– Tamatumap kingunerisaanik unnerluunneqartoq præsidentitut toqqaqqinneqarnissaminut piumanngisaminik periarfissinneqarsimanngilaq. Taamak iliornera Cataloniami inuiaat sinnerlugit iliorneruvoq, taamalu Cataloniami inatsisiliortut suleqqilernissaanut aqqutissiuilluni, aamma namminersorluni aqutsisoqarfiunerup innarlerneqannginnissaanik salliutitsineruvoq – Cataloniap namminersulivinnissamut aqqut ingerlavigisaa innarlernaveersaarneqarpoq, ataatsimiititaliaq ilaatigut tunngavilersuivoq.

Maannamut politikerit namminersulivinnissamik illersuisut arlallit parnaarussaaqqapput, ilisimaneqanngilarlu qaqugu taakku iperagaasanersut.

– Naatsorsuutigaara inatsisinik unioqqutitsisimanngitsumik præsidentissaminnik toqqaassasut, Spaniap naalakkersuisunut siulittaasuat, Mariano Rajoy, TV-qarfimmut Telecincomut oqarpoq.

– Suut allat tamarmik illaruaatiginninnerupput. Uanga aalajangiissaguma, kinaluunniit toqqarsinnaavaat, kisianni inatsisinik unioqqutitsisimasumik toqqaassappata tamanna kukkorujussuarnerussaaq, aamma ima oqariartornerussaaq; aporaanneq ingerlatiinnarumavarput, Mariano Rajoy oqarpoq.

Naalagaaffiit Peqatigiiffiannut saaffiginnissummi Carles Puigdemont oqarpoq, “politikki aallaavigalugu Madridimut oqaluussinissaq piareersimaffigigini”, tamannalu “Cataloniami innuttaasut sinnerlugit ingerlanneqassasoq, aamma “politikki pissutigalugu parnaarussat” iperagaanissaanik qulakkeerinninniarnerussasoq.

Parnaarussanut ilaapput Cataloniami præsidentip tullersorterisimasaa, Oriol Junqueras, aamma Cataloniami nunamut namminermut naalakkersuisuusimasoq, Joaquim Forn, tamarmillu pikitsitsisimasutut pikitsitsinissamullu kajumissaarisimasutut eqqartuunneqariaannaapput.

Carles Puigdemont sinnerlugu Brusselimi oqaaseqartoq oqarpoq, pisut eqqarsaatigissagaanni erseqqissoq, Spania sakkugineqarsinnaasut tamaasa atorlugit nunap immikkoortuata namminersulivinnginnissaanik qulakkeeriniarsarisoq.

– Cataloniami namminersulivinniarneq ipitinniarsarineqarpoq, aamma iliuuserineqartut tamarmik Cataloniap Madridimiit naalakkersorneqaannarnissaanik siunertaqartumik ingerlanneqarput, Brusselimi Puigdemonti sinnerlugu oqaaseqartoq, Ben Emmerson oqarpoq.

Aaqqissuisut

Nunarput pillugu sammisaqarfik

%d bloggers like this: