Puigdemont iperagaavoq

Tyskit Nunaanni Neumünsterimi Cataloniap præsidenterisimasaa, Carles Puigdemont, marsip 28-anili pikitsitsisimasutut Spaniamit unnerluunneqarluni tigummigallarneqalerpoq. Maanna iperagaavoq.

Cataloniap presidentia maanna iperagaavoq, Catalan News unnummut allapput.

Puigdemonti pikitsitsisimasutut eqqartuunneqartussatut tunniunneqarnissaa Spaniap piumasarisimagaluarpaa. Tamannali Neumünsterimi eqqartuussiviup tunngavissaqanngitsutut itigartippaa.

Tunniunneqarsinnaaneranut suliaq ingerlaqqittussatut oqaatigineqarpoq, maanna aningaasanik atornerluisimasutut Spaniamit pasillerneqarnera tunngavigalugu.

Pasilliineq tamanna paasisaqarfiginerujumallugu Tyskit Nunaanni eqqartuussiviup piumasaraa, Spania paasissutissanik annertunerusunik eqqartuussivimmut tunniussaqassasoq.

Iperagaanerata saniatigut decembarimi nutaamik qinersisoqarnerata kingorna siullerpaamik Cataloniami inatsisartunut Puigdemonti qinerseqataasinnaasimavoq, tamannalu sinniisoq aqqutigalugu pivoq.

Aaqqissuisut

Nunarput pillugu sammisaqarfik

%d bloggers like this: