Sofia Geisler. Assiliisoq: Inuit Ataqatigiit

Pisassinneqartartut naapertuilluartuupput

Aalisarsinnaanermut akuersissutit aallaavigalugit aalisarnermut maannakkut akuusuni ilaannakortumik tamakkiisumilluunniit piginnittuuffigisanik suliffeqarfinnik eqqartuussivitsigoortumik ingerlatsisinnaajunnaarsitaasimasunik akoqarnersut Naalakkersuisunit tamakkiisumik ilisimaneqarnerluni, Inatsisartunut ilaasortaq, Sofia Geisler (IA) Ā§ 37 naapertorlugu juulip aallartinnerani naalakkersuisunut apeqquteqarpoq.

– Inuiaqatigiinniit atugassanngortinneqartarput pisassiissutit aningaasarpassuarnik naleqartut, pingaaruteqarporlu pisassiissutinik atuisussanngortinneqartut unneqqarissuunerisa uppernassuseqarnerisalu apeqquserneqannginnissaat, tamannalu tunuliaqutaavoq Naalakkersuisunut taamatut apeqquteqarninnut, Sofia Geisler apeqquteqaammini nangilluni allappoq.

– Kalaallit Nunaanni aalisarnermik ingerlataqareersut akornanni suliffeqarfinnik eqqartuussivitsigoortumik ingerlatsisinnaajunnaarsinneqarsimasunik ilisimasaqanngilanga, Erik Jensen akissuteqarpoq.

Sofia Geisler nangilluni aperivoq, aalisarsinnaanermut akuersissutinik tunniussinermi tungavinnut ilaatinneqartarnersoq, qinnuteqartut aningaasanut tunngatillugu allatigulluunniit atornerluisimanermut tunngasunik eqqartuussivikkoortumik eqqartuunneqarsimanersut imaluunniit pisortanut akiitsoqarnersut?

– Naamik ilaatinneqartanngillat, Erik Jensen akivoq.

Aaqqissuisut

Nunarput pillugu sammisaqarfik