Piviunngitsunik suliassarsiortut

AAQQISSUISUT. Pisortat suliffeqarfiutaat piviunngitsunik suliassarsiortunngorsimapput. KNI-mi ”Pitsaasut ApS” pillugu suliaq mamianartuliorneruvoq, aamma kisermaassisussaatitaallutik pisortanit ingerlatsiffiit nalinginnarmik niuffaffiit iluani ingerlatsisuussorisarnerannik ersersitsivoq.

Eqqumiippoq niuernerup iluani eqqussuisussatut Næstvedimi suliffeqarfimmik aallartitsisoqarsimammat, siunertaralugu illoqarfinnut minnernut nunaqarfinnullu nioqqutissanik ”pilerinarsaarineq”, aamma tamanna Kalaallit Nunaanni pisortat aqqutigalugit aningaasanik atukkiussinikkut qularnaveeqqusersuinikkullu pisinnaammat. Pisortat aningaasaataanik paarinerluinerujussuarmik tamanna takutitsineruvoq.

Pilerinarsaarisoqartariaqanngilaq (tuluttut ’branding’) aamma tuniniaanermi pilerinarsaaralunilu annertusaaniartoqartariaqanngilaq (tuluttut ’marketing’), tassami sumiiffinni pisisartut kisermaasisup KNI-p eqqussugai ilitsivinnullu inissitsitertagai taamaallaat pisiarissallugit periarfissaqartinneqarput. “Pitsaasut” aallartinneranut siunertaassimappat pisiassat kalaallisut allagartalersorneqassasut, taava tamanna sumiiffinni printeriliinikkut labelinillu anillatsitsisarnikkut naammassineqakuttoorsinnaavoq, aamma pisortat aningaasaataat atorlugit Næstvedimut akiligassarpassuarnik pilersitsinngikkaluarluni.

Pitsaasut ApS ukioq naatsorsuiffimmi 2016-mi, aallartinneqarnerminiit ukiut marluinnaat qaangiuttut, 72 millionit koruuninik akiitsoqalersimavoq.

Ilumut paasissaanngilaq qanoq KNI aamma kisermaassillutik ingerlatsisut allat ’marketingsafdeling’-iliortarmata (pilerinarsaarillutillu annertusaaniartussat). Tassanerpiarlu suut tamarmik equsoorujussuartarsimassapput. Immikkoortortaqarfimmik ’marketing’-imik ingerlatsinissaq siunertaqaranilu isumaqanngilaq. Pisisartunut nioqqutissanik aalajangersimasunik pisariaqartitsilersitsiniarnissaq aallunneqartussaanngivippoq, aamma taamaakkami illersorneqarsinnaasumik immikkoortortaqarfiit taamaattut ingerlanneqarsinnaanngillat. Immaqa kisermaasillutik ingerlatsiffiit ”tuniniaaneq” aamma ”pilerinarsaaraluni annertusaaniarneq” immikkoortissinnaanngilaat? Immaqa ’marketing’-imut immikkoortortaqarfiit siullertut politikkikkut ingerlatsivinnut inuiaqatigiinnullu imminut illigeqqusaarnermut atorneqartarsimassapput; atorfissaqartinneqarnertik pinngitsoorneqarsinnaannginnertillu uppernarsiniarsarissallugu, aamma immaqa allaat tapiissutinik amerlanerusunik pissarsiniarnermut politikkikkullu salliutinneqarnissamut sunniiniarnermut atorneqartarsimassapput?

Qanorluunniilli; ilumut nioqqutissat kiffartuussinerillu tamarluinnangajammik kisermaassilluni ingerlatsinertut iluseqartinnissaat suli pisariaqarpa, aamma takorloorneqarsinnaava illoqarfinni minnerni nunaqarfinnilu – Namminersorlutik Oqartussanit akilersinnaanngitsutut naqissuserneqarsimasuni – namminneq nioqqutissanik kiffartuussinernillu pilersorsinnaanissaminnut sapiutinngitsut, taamalu illuinnarni atukkatik namminneq isumagalugillu ilusilersorsinnaagaat? Ilumut pisariaqarpa politikkikkut-allaffissornikkut ingerlatsiffiit sunut tamanut paarsisutoqqatut inissisimassasut, aamma innuttaasut atukkaminnut pitsanngorsaataasinnaasutut kissaatigisaat tamangajammik taakkunannga akuereqqaarneqartarnissaat pissusissamisoorpa? Pisariaqarpalu taakkorpiaat allatut aaqqiissutissanik nukissaqaratillu isumaqanngivitsillugit?

Pineqartumi apeqquterpassuit akissuteqarfigineqartariaqarput, tamannalu minnerpaamik pisortat nukissaqarfigisariaqarpaat. Pisup erseqqissarpaa suliffeqarfinnik pisuusaartunngorsimasunik pilersitsiortorsimasugut, aamma unammilleqatigiilluni niuffaffinni inissisimasoralutik sinnattuaqisunik. Tamakku tamarmik sullitanut, allanik toqqaanissaminnut periarfissaqartinneqanngitsunut, akiligassanngortinneqarput.

 

Aaqqissuisut

Nunarput pillugu sammisaqarfik

%d bloggers like this: