Parnaarussat 40-t juunimi Iqalunniit aallarunneqartut. Assiliisoq: Nunatsiaq News

Pikitsitsisut aqqanillit unnerluutigineqarput

Toqutsinissamik sioorasaarineq, kiinarpalersorsimaneq sulisumullu saassussisimaneq unnerluussissutigineqartut ilagaat. Iqalunni parnaarussivimmi, Baffin Correctional Centremi, juunimi pikitsitsisoqarnera taamak inerneqarallarpoq.

Aamma atuaruk: Parnaarussat perullulioramik aallarunneqarput

– Paasiniaanerit inernerigallarpaat inuit aqqanillit unnerluutigineqartussanngormata, taakkulu pikitsitsinissamut kaammattuisimasutut pasineqarput aamma aserorterisimanermi siuttuusimasutut isigineqarput, unnerluussisut Nunatsiaq Newsimut oqarput.

Paarnaarussat 26-it pikitsitsisimasutut kinaassusersineqarsimapput, parnaarussivillu aserorterneqarsimaqimmat inuit 40-t Canadap kujasinnerusortaanut parnaarussivinnut allanut taamani nuunneqarput. Unnerluutigineqartut aqqi ilanngullugit ilisimatitsissutigineqarput.

Ullumi unnerluutigineqartut akornanni arfineq-pingasut suliarineqarput, tamannalu Ontariomi pivoq. Pingasut tassunga nuunneqartussatut inassutigineqarsimapput.

Eqqartuunneqarnissaat aggustip 14-ani pissasoq naatsorsuutigineqarpoq.

Aaqqissuisut

Nunarput pillugu sammisaqarfik