Peqqinnissaqarfimmi ilinniagaq nutaaq

SANA-mi pisiniarnermut quersuaqarnermullu immikkoortortaqarfiani maanna quersualerisutut assartuisutullu ilinniartoqarsinnaanngorpoq.

Ilinniarneq Peqqinnissaqarfiup Saviminilerinermillu Ilinniarfiup suleqatigiinnerisigut aallartinneqarsimavoq.

Pisiniarnermut quersuaqarnermullu immikkoortortaqarfimmi aqutsisup, Ann Kelsenip oqaatigaa, quersuaqarfimmi sulisut allagartalimmik ilinniarsimanngitsut, kisianni ukiorpassuarni misilittagaqarsimanertik piginnaasaqalersimanertillu aallaavigalugit, ilinniarsimasunngorsinnaanissaat ilanngullugit aqqutissiuunneqarsinnaasoq.

– Peqqinnissaqarfik nunami maani ilinniarfiit annersaraat, Dronning Ingridillu Napparsimavissuani quersuaqarfiup pisiniarnermut immikkoortortaqarfittaa eqqarsaatigalugu assigiinngitsorpassuarnik suliaqartoqartarpoq sulisullu ukiorpassuarni sulisimanermikkut nalunngilluinnarpaat assartugassat pisiallu peqqinnissaqarfiup iluani qanoq suliarineqassanersut, taamaakkaluartorli ineriartoqqittoqarnissaanut allagartaqarnissaq pingaaruteqarpoq, aqutsisoq Ann Kelsen oqarpoq.

Ilinniarneq ukiuni pingasuni ingerlanneqassaaq, ilinniarnerullu ingerlanerani tallimariarluni annerpaamik sapaatip akunnerini aqqaneq-marlunni sivisussusilimmi atuakkerineq ingerlanneqartassaaq. Ilinniarnermi quersuarmi aqutsineq, nioqqutissanik tuniniaaneq pisiniarnerlu, assartuineq assartugassanillu assigiinngitsunik suliaqarnerit ilinniarneqassapput.

Ilinniartuni siulleq, Bent Jakobsen, ukioq maanna januaarimi aallartippoq. Taanna 25-nik ukioqarpoq.

– Ilinnialernera pikkorissalerneralu uannut pingaaruteqartorujussuuvoq, taamaasiornerami aamma siunissamut eqqanaarinninneruvoq, Bent Jakobsen oqarpoq.

Ilinniarneq pillugu uani paasisaqarnerusinnaavutit