Peqqinnissaqarfik sulisussaaleqeqisoq

Nakorsat 50-it amigaataapput aamma peqqissaasut 190-it amigaataapput. Sulisussaqarneq pillugu taamaallaat nakorsat peqqissaasullu kisimik amigaataanngillat. Peqqinnissaqarfimmi naammattumik sulisussaqannginneq naammassisassanut tamanut atuuppoq – ilinniarsimasut soraarummeersimanngitsullu tamarmik akulerullugit, kisianni peqqissaasut malunnarnerullutik inissisimapput.

Inatsisartunut ilaasortaq Malene Vahl Rasmussen (D) juulip 13-ani naalakkersuisunut apeqquteqaataa tunngavigalugu naalakkersuisut ilaatigut taamak akissuteqarput.

– Nakorsat aamma peqqissaasut qanoq amerlatigisut atorfeqartinneqartariaqaraluarpat, Malene Vahl Rasmussen ilaatigut aperivoq.

Peqqinnissaqarfimmi nakorsatut atorfiit 100 missaaniipput aamma peqqissaasutut atorfiit 300-t missaaniipput. Taakkunannga ullumikkut nakorsat 50-it missaat atorfeqartinneqarput aamma peqqissaasut 110-t missaaniittut.

– Taakku saniatigut peqqissaasut sinniisuusartut 33-t sulipput, peqqissaasullu sinneri 150-it missaaniittut sivikitsuinnarmik atorfeqartussatut isumaqatigiissuteqarfigineqarsimapput, peqqinnissamut naalakkersuisoq, Doris J. Jensen akissummini allappoq.

– Atorfinitsitsiniartarnerup ajornakusoorneranut pissutaasut ilagaat inuiaqatigiinni atugassarititaasut, soorlu illussaqarneq, akissarsiat, sivikitsumik atorfeqartunut akileraarutitigut nalimmassaannginneq, meeqqat paaqqinnittarfii, atuarfiit, ilinniarsimassutsi aamma aapparisap suliffissatigut periarfissaqartinneqannginnera, Doris J. Jensen akissummini allappoq.

Taamaattoq naalakkersuisoq erseqqissaavoq, peqqutaasut ilagigaattaaq, Danmarkimi peqqissaasut atorfissaqartinneqartut amerlisimanerat aamma Nunat Avannarliit eqqarsaatigalugit nakorsat peqqissaasullu piumaneqarnerulersimasut.

– Unamminartut ilagaattaaq sinerissami peqqinnissaqarfimmi atorfillit suleruluttarmata aamma kisimiittutut misigisimasarmata. Sumiiffiit ilaanni piumaffigineqarneq annertusinnaavoq, aamma taamaakkami ilaasa taakkunani sulilernissartik kissaatigineq ajorpaat, Doris J. Jensen akissummini ilaatigut allappoq.

Naalakkersuisoqarfiup ilanngullugu ilisimatitsissutigaa, ukioq manna juuni tikillugu sinniisuusartut sulisut 24 millionit koruuninik akeqarsimasut, aamma nakorsat siniisut marloriaammik akeqartartut, peqqissaasullu 50 procentimik akisunerusartut.

Akissut tamaat uani atuarsinnaavat.