Nakorsat qullersaat matorluivoq

Peqqinnissaqarfimmi nakorsat qullersaat Assia Brandrup-Lukanow, peqqinnissaqarfiup aqutsisoqarfiani ukiup affaanik sivisutigisumik atorfeqareerluni soraartussanngorpoq.

Suleqatigiinni ajornartorsiuteqarneq pissutigalugu suliunnaarpoq, peqqinnissaqarfiup qullersaqarfianit taama nalunaaruteqartoqarpoq.

Peqqinnissaqarfimmi sulisut peqqissutsimut aqutsisoqarfiata pisortaanit  sapaatip akunnerani kingullermi tallimanngornikkut mailikkut allaffigineqarput, Assia Brandrup qaammatit arfineq marluk atorfeqareerluni, Peqqissutsimut Aqutsisoqarfimmi atorfeqarunnaartoq.
Peqqissutsimut aqutsisoqarfik peqqinnissaqarfimmi qullersaqarfiuvoq.

– Peqqissutsimut aqutsisoqarfiup tamanna ajuusaarutigaa, akuerisariaqarluguli,  aqutsisoqatigiit suleqatigiissinnaasimannginnerat nassuerutigaat, aqutsisoqarfimmi pisortaq Malene Nielsen peqqinnisssaqarfimmi sulisunut taama allappoq.

Assia Brandrup nakorsatut aamma tarnip pissusaanik immikkut ilinniagaqarpoq, naalagaaffiit peqatigiit peqqinnissamut immikkortortaqarfiani WHO-mi aamma Københavnip universiteani ukiuni arlalinni atorfeqarsimalluni.

Aqutsisoqarfiup pisortaa Malene M. Nielsen nakorsat qullersaata suliunnaarnera pillugu KNR-imit aperiniarneqarsimagaluarpoq,  peqqinnissaqarfiulli paasissutissiisarfianit nalunaarutigineqarpoq, inunnut ataasikkaanut tunngassuteqarmat annerusumik oqaaseqarfigineqarsinnaanngitsoq.

Assia Brandrup pisortatigoortumik februarip 28-ani suliunnaassaaq. Taassuma tungaanut sulliffimmini suliunnaarsinneqarallarpoq.

Aaqqissuisut

Nunarput pillugu sammisaqarfik