Bentiaraq Ottosen. Assiliisoq: Inatsisartut

Peqqinnissaqarfik cannabis pillugu qanoq pilersaaruteqarpa

Ulluni makkunani cannabis uuliap nakorsaatitut akuerineqarnissaa anguniarlugu atsiornernik katersuisoqarpoq, siunertaralugu apeqqut Inatsisartuni oqaluuserineqassasoq.

Maanna Bentiaraq Ottosen (A) naalakkersuisunut apeqquteqarpoq, cannabis uuliap nakorsaatitut atorneqalernissaa naalakkersuisut qanoq isumaqarfigineraat.

– Nunatsinni cannabis uuliap kræftertunut nakorsaatitut atuutinneqalernissaa qanoq isumaqarfigaasiuk aamma peqqissutsimut naalakkersuisoqarfik qanoq tamanna pillugu pilersaaruteqarpa, Bentiaraq Ottosen aperivoq.

Taanna tunngavilersuivoq oqarluni, naluneqanngitsoq nunatsinni nakorsaatit annertuumik aningaasatigut atuiffiusut,  qularnanngitsumillu nakorsaatit atortakkavut inuup inuuneranik kinguneqartarsimassasut.

Aamma atuaruk: Cannabis uulia nakorsaatitut ammaanneqaqquaat

– Nappaassuaq kræfti ajoraluaqisumik nunatsinni toqqutaajuarpoq tamatsinnut annernartaraluaqisoq, taamaattorli piffissanngorsimavoq nutaamik eqqarsarluni politikikkut anguniagaqarnissaq. Ullumikkut nakorsaatit atortakkavut, soorlu kemo atorlugu katsorsaariuseqarneq, ullutsinnut tulluukkunnaariartorsimavoq, tassami aningaasarpassuit atorlugit ingerlanneqartarnera pissusissamisoorunnaariartorsimammat, Bentiaraq Ottosen apeqquteqaammini allappoq.

– Taamaammat cannabis uulia atorlugu katsorsaasinnaaneq nunatsinnut tulluarnerusutut isikkoqarpoq, nakorsaatinik allanit atuinerunermiit apparsaataasinnaalluni. Taamaammat pingaarluinnalerpoq tamakkiisumik kræftertunut, parkinsonertunut annertuumillu gigteqartunut, cannabis uuliap nakorsaatitut salliunneqalernissaa. Akikinneroqaaq nakorsaaterpassuarnullu sanilliullugu akuutissanik assigiinngitsunik akoqannginneruvoq, Bentiaraq Ottosen allappoq.

Atsiornernik katersuiniarneq maanna 1.462-nit tapersersorneqarpoq. Atsiornernik katersineq uaniippoq: https://www.change.org/p/inatsisartut-cannabis-olia-inatsisartuni-ukiaanerani-ataatsimiinneranni-eqqartorneqarli

Bentiaraq juulip 18-ani apeqquteqarpoq, naalakkersuisullu kingusinnerpaamik ullut qulit ingerlaneranni akissuteqartussaapput.

Aaqqissuisut

Nunarput pillugu sammisaqarfik