Partiit maannamut ataatsimik ataatsimoorussaqarput

Inatsisartunut qineqqusaarneq maannamut killiffissioraani, qineqqusaartunut sorpassuit siunnersuutigineqartarsimappat, ilaat isumaqatigiikkannernissaq eqqarsaatigalugu iluatsitsinerusumik ilaallu iluatsitsinnginnerusumik.

Maannamut erseqqissumik amerlanerusunit isumaqatigiissutigineqartoq tassaavoq Inuussutissalerinermut Aqutsisoqarfiup (fødevarestyrelsen) nunatsinnut nuunneqarnissaa. Inuit Ataqatigiit, Siumut, Partii Naleraq allallu tamanna isumaqatigiissutigaat.

Inuussutissalerinermut Aqutsisoqarfik maanna Danmarkimiit ingerlanneqarluni nunatsinnut sullissisarpoq, allaffeqarfillu nunatsinnut toqqaannaq tunngassuteqarnerusoq Jyllandip Avannaani inissisimavoq, taakkulu aalisariutini, suliffissuarni assigisaanillu inuussutissalerinermut isumannaatsuunissaq sammillugu nakkutilliisarput oqartussaallutillu.

Ullumikkut uumasuuteqarnermut inuussutissalerinermullu tunngassuteqartutigut akisussaaffiit Kalaallit Nunaata Danmarkillu akornanni avitseqatigiiffigineqarsimapput. Tamanna pissuteqarpoq, Kalaallit Nunaata 1992-mi peqqinnissaqarfimmut tunngassuteqartut akisussaaffigilermagit – taamani Danmarkimi peqqinnissaqarfiup ataani inissisimatinneqartut.

Sinneri nunalerinermut aalisarnermullu ministereqarfiup ataani inissisimasut ilanngullugit taamani akisussaaffigilerneqanngillat, taakkulu makkuupput:

  • Neqinik nerpinnillu suliaqarnerup iluani nakkutilliineq aamma nunanut allanut tunisassiornerup iluani akuersisarneq. Tassani nunami imarmilu suliffiit pineqarput (fabrikkit, kilisaatit, aalisariutit nioqqutissiortut).
  • Suliffeqarfiit attakunik uumasunit pisunit passussinerannut nakkutilliineq akuersisarnerlu.
  • Uumasuutit akornanni tunilaassuunerup nakkutigineqarnera, soorlu perlorunnerit assigisaallu.
  • Uumasut nunatsinnut eqqunneqartut peqqissutsikkut nakkutigineqarnerat.
  • Nerisassaanngitsut uumasuniilli pisut aamma uumasut anninneqarnerinut atatillugu akuersisartuuneq.
  • Uumasut nakorsaqarnerup nakkutigineqarnera.
  • Uumasunut nakorsaatit nakkutiginerat akuersissutigisarnerallu.

 

 

Aaqqissuisut

Nunarput pillugu sammisaqarfik

%d bloggers like this: