Partii nutaaq, Nunatta Qitornai, atsiornernik ullumi tunniussissasoq

Partiip aallartitsisua, Vittus Qujaukitsoq, ullumi marlunngornermi qinigassanngortitsisinnaaneq anguniarlugu Nuummi kommunip allaffianut atsiornernik tunniussiniarpoq.

Siusinnerusukkut atsiornernik Nunatta Qitornai tunniussereersimagaluarput, kisianni atsiornerit 200-ut missaat akuerineqarsinnaassimanngillat.

Vittus Qujaukitsoq 2017-mi apriilip tungaanut naalakkersuisunut ilaasortaasimavoq. Naalakkersuisut Siulittaasuata, Kim Kielsenip, nunanut allanut tunngassuteqartut Vittup naalakkersuisoqarfianit peernialermagit, Vittus Qujaukitsoq naalakkersuisunit tunuarpoq.

Kingorna septembarimi Siumup ataatsimeersuarnerani Vittus Qujaukitsoq Kim Kielsenimut unammillerpoq, Kimmilu amerlanerussuteqarluarluni siulittaasutut ingerlaqqippoq.