Partii Naleraq: Sikuki Harbour matuneqassaaq

Partii Naleraq isumaqarpoq, Sikuki Harbour A/S matuneqartariaqartoq. Partii sinnerlugu Inatsisartunut qinigassanngortittoq, Lars Jørgen Kleist, partii sinnerlugu oqariartorpoq, imaatigut inuussutissarsiortut tilligarfigineqarnerat naammalersoq.

Taanna oqarpoq, suliffeqarfik 2017-imi akileraarutit ilanngaatiginagit 12,5 mio. koruuninik sinneqartoortoq.

– Partii Naleraq isumaqarpoq piaarnerpaamik Sikuki Harbour atorunnaarsinneqassasoq. Tamanna pissaaq Nuummi talittarfimmik sanaartortoq, Per Aarsleff A/S, paaseqatigineqareerpat. Tassami suliap kinguartoorneranut tunngatillugu aningaasatigut sunniutai nalilersorneqarlutik maanna ingerlasut naammassineqaqqaassapput, Lars Jørgen Kleist oqarpoq.

– Suliffeqarfik Royal Arctic Linemut ilanngutitinneqassaaq, tassami Sikuki matuneqarpat inuiaqatigiit ukiumut 5 mio. koruuninik ileqqaaruteqassapput, taanna oqarpoq.

– Partii Naleqqap kissaatigaa, aalisartut, takornarialerisut aamma angallatit trawlerkajimi, fiskerkajimi, kutterkajimilu atuisut, tilligarfigineqarnerat unissasoq. Massakkut angallatit 70 BT tikillugu oqimaassusillit ukiumut 18.360 koruuninik akiliisinneqartarput aamma saniatigut aalisartortagut tonsimut tunisaat 35,70 koruuninik akileraaruserneqartarput, Lars Jørgen Kleist oqarpoq.

– Partii Naleqqamiit naammagilerparput imaatigut inuussutissarsiortortatta aningaasatigut nammakkersorneqarnerat, taanna oqarpoq.

 

 

Aaqqissuisut

Nunarput pillugu sammisaqarfik

%d bloggers like this: