Tigusiffik: Partii Naleraq

Partii Naleraq eqqumiitsullu allat

EQIKKAANEQ – Qallunaat aviisiani, Jyllands-Postenimi, Asii Chemnitz Narup ungasinngitsukkut allaaserisaqarpoq oqarluni, Partii Naleqqap illoqarfiup pingaarnersaata mittarfissuartaarnissaanut (2200 meteri, aaqq.) nalorninera partiip nammineq anguniagaanut akerliulluni inissisimasoq, aamma Kalaallit Nunaat namminersortoq pilersinneqassappat Kalaallit Nunaat ineriartorfiulluni inuttunerusariaqartoq.

–  Imminnut assortuuttoq tassaavoq, Partii Naleraq, illoqarfiup pingaarnersaanni pisariaqartumik mittarfiliortoqarnissaanut akerliunermigut, nammineq anguniakkaminik kigaallassaammat: Kalaallit Nunaat namminersortoq, Asii Chemnitz Narup ilaatigut allappoq.

Kinguninnguaq Partii Naleraq sinnerlugu Jens Napãtôk’ akissuteqarluni oqarpoq, Nuup avataani aamma inoqartoq, taakkulu aamma puigorneqassanngilluinnartut.

Aamma atuaruk: Jens Napãtôk’: 1199 meteri naammappoq

– KNI Pilersuisup, Tele Greenlandip aamma Royal Greenlandip sinneqartoorutai tamarmik mittarfissualiornissamut nakkaatiinnalernissaat pissusissamisoorpa?, Napãtôk’ 1199 meterinik sanaartoqqusilluni oqarpoq.

Kingorna Napãtôk’ angerlarterluni Qanorooq aqqutigalugu oqarpoq, “2200 meterit partiimit ajoriffissaqartinneqanngitsut.”

Maanna erserpoq Partii Naleraq isummaminik allanngortitsisimanngitsoq. Ilulissani aamma Nuummi 2200 meterit sanaartorneqarnissaanut taarsiullugu partii siunnerfilersuisimalluni ippassaq facebookikkut ilisimatitsivoq.

– Partii Naleqqap siunnersuutaa akeqarpoq: 200 millionit koruunit. 2200 meterimik siunnersuut akeqarpoq 3600 millionit koruunit. Nuummi Ilulissanilu mittarfiit piusut (950-845 meter) siunnersuutigisatsitut talligunik (1199 meter) ilaasut minnerpaamik marloriaatinngussapput. Nunattalu tamanna akissaqartippaa. Eqqaamaneqassaaq kingorna akissaqartileraanni piareersimaffigigaannilu tallilerneqarsinnaanerat pisinnaajuassammat, Partii Naleraq allappoq.

Nunarput siusinnerusukkut allappoq, Partii Naleraq Napãtuup akissuteqarneratut inissisimassappat, Naalakkersuisut atangaarnissaat ilimananngitsoq.

– Mittarfinnut apeqqutit akissutisiniarlugit Naalakkersuisut Inatsisartut immikkut ittumik ataatsimiigiaqquniarpaat, Inatsisartunillu akuersisitsiniarnermi naalakkersueqatigiittut ataqatigiinnermik takutitsisinnaanngikkunik ingerlaqqissinnaanissaat annerusumik ilimanaateqanngilaq. Partii Naleraq allamik taarserneqanngippat qinersisitsisoqaqqittariaqassaaq – immaqa, Nunarput allappoq.

Kingorna Inatsisartut immikkut ittumik ataatsimiigiaqquneqarnissaat pineqarunnaarpoq, maannalu ileqquusumik ukiakkut ataatsimiinnissaq kisiartaalluni Inatsisartut qupperneranni allassimavoq.