Oqaasilerisut: Oqaasersiat immikkut ingerlanneqassapput

Oqaasilerisut kingullertigut oqaatsinik atinillu suliaqarsimaneranut atatillugu Nunarput allaaserisaqarami, Oqaasilerisunut arlalinnik apeqquteqarsimavoq.

Apeqqutigineqarpoq aqqit eqqarsaatigalugit sooq ‘g’-mik aallaqqaatillit akueriumaneqannginnersut, oqaatsitsinnimi ‘g’ sorpassuartigut atorneqartarmat, soorlu; gigti, geologii, gipsi, girokorti, gorilla, grammi allallu, aamma allamiut aqqisa atorneqarnissaat ajoqutissaqartinneqanngimmat, soorlu gunnar, gudrun, grete, ghita allallu. Apeqqutigineqarportaaq, sooq Nayaaya, ‘j’-qanngimmat akueriumaneqannginnersoq.

Oqaasiliortut akissumminni allapput, Oqaasiliortut aternik akuersisarnerminni kalaallisut allattaatsit marluusut, allaasitoqaq allaasitaarlu aallaavigisaraat, tassanilu malittarisassat aallaavigalugit kalaallit aqqi akuerineqartartut.

– Aqqit taakkartorneqartut oqaasersiaapput aqqillu kalaallisuumit pilerfeqaratik. Aqqit Oqaasiliortut suliarisartagaat tassaapput aqqit kalaallit oqaasiinit pilerfillit. Taamaattumik kalaallisut oqaatsitsinni g-mik aallartittoqarneq ajormat k innersuussutigineqarpoq. Taamatullu aamma Nayaaya-mi j atoqquneqarluni, kalaallisut allattaaseq malillugu y ilaanngimmat. Allamiut aqqi qinnutigineqaraangata Danmarkimi Kirkeministeriamut innersuunneqartarput, Oqaasilerisut akissumminni allapput.

 

Aaqqissuisut

Nunarput pillugu sammisaqarfik

%d bloggers like this: