Nuummi Ombudsmandip allaffia, qanga Herrnhutit oqaluffiat.

Ombudsmandi: Inatsisinit tunngavilimmik aqutsisoqassaaq

Aalisarnermut, Piniarnermut Nunalerinermullu Naalakkersuisoqarfik pisassiissutinik akuersisarnermini ukiorpassuarni “ukiup siuliani assingusumik” akuersissuteqartoqarsimanissamik piumasaqaateqartarsimavoq. Tamannalu Ombudsmandimit apeqquserneqarpoq.

– Aalisarnermut, Piniarnermut Nunalerinermullu Naalakkersuisoqarfiup aalisarsinnaanermut akuersissutinik qinnuteqaatit qinnuteqartut ukiup siuliani taamaattumik akuersissutaateqarsimannginnera innersuussutigalugu itigartitsinissamut inatsisikkut tunngavigisap qanoq paasineqarnissaanik nassuiaataata isummerfiginissaanut siusinnerusukkut periarfissaqarsimavunga, Ombudsmandi allappoq nangillunilu.

– Suliaq Ombudsmandimit nammineerluni misissuiffiginninnermut tunngasoq pillugu oqaaseqaatinni ilaatigut oqaatigaara, Naalakkersuisoqarfiup aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaanni imaattumik aalajangersaanissaminut tunngavissaqarnera qularnartutut isigigiga: “Aalisarsinnaanermut akuersissut taamaallaat angallatinut suliffeqarfinnulluunniit ukiup siuliani taassuma assinganik aalisarsinnaanermut akuersissutaateqarsimasunut qinnuteqartoqarneratigut tunniunneqartarpoq.”

Pineqartoq tassaavoq, ilumut naalakkersuisoqarfik inatsit atuuttoq tunngavigalugu inuussutissarsiutigilerlugu aalisarusukkaluartunut mattussinissaminut piginnaatitaanersoq. Inatsimmi atuuttumi akuersissuteqarnissamut pineqarput “nungusaataanngitsumik aalisarneq”, “pisaqarsinnaassutsi” aamma “aalisartut kalaallinut inuiaqatigiinnut aalajangersimasumik attuumassuteqassasut”.

Ombudsmandip saaffiginninnerata kingorna Naalakkersuisoqarfik suleriaatsiminik allanngortitsisimavoq, kisianni inatsimmut atuuttumut suli naapertuutsinnginnera aamma Inatsisartuniit piginnaatitsissummik qaangiisoqarnera, Ombudsmandip suli uparuartorpaa.

Ombudsmandi allappoq, saaffiginnissuteqarnerup kingorna akuersissutinik tunniussisarnermi periutsinik naalakkersuisoqarfik allannguinikuusoq.

– Taamaalilluni ilisimatitsissutigineqarsinnaavoq, ukiup tullissaanut aalisarnissamut akuersissummik tunineqassagaanni taava ukiup siuliani akuersissutip tunniunneqartup atorneqarsimanissaa naalakkersuisoqarfimmit piumasaqaataajunnaartoq, Ombudsmandi ilaatigut allappoq nangillunilu.

– Taamaattorli naalakkersuisoqarfiup piumasaqaat manna aalajangiusimavaa, tassalu qinnuteqartup ukiup siuliani akuersissummik assingusumik peqareersimanissaa.

Naalakkersuisoqarfik akissummini allappoq, piumasaqaat tamanna aalisarnermut inatsimmut naapertuuttuusoq naalakkersuisoqarfiup nalileraa, aamma Ombudsmandip oqaaseqaataanut atatillugu naalakkersuisoqarfik allatut isummernissaminut pissutissaqarsorinngitsoq. Taamaattorli angerlartertoqalaarpoq.

– Periutsip taassuma inatsisitigut naleqqussarneqarnera sukkulluunniit nalornisoorutigeqqunagu, inatsisip naleqqussarneqarnissaa naalakkersuisoqarfiup sulissutigilerpaa, ilaatigut akuersissuteqartarnermi periutsit nutaat ataatsimoortinneqalernerannik kinguneqartussaq, naalakkersuisoqarfik allappoq.

Naalakkersuisoqarfik taamak angerlartertoq, Ombudsmandi suli naammaginninngilaq.

– Naalakkersuisoqarfik inatsisitigut tunngavigisaq eqqarsaatigalugu aqutsiveqarfimmit aqutsiveqarfimmut assigiinngitsunik qanoq iliorluni periaaseqarsinnaanera uannut imaaliallaannaq paasiuminaappoq. Aalajangiisuusoq tassaavoq, aalisarneq pillugu inatsimmi aalajangersaaneq tunngavissaqarnersoq.

Ombudsmandip oqaatiginiagaa tassaavoq, inatsit sumiiffimmiit sumiiffimmut allanngorartittarlugu atuutsinneqarsinnaanngimmat, aamma aqutsinermut sakkussat inatsimmit pisariaqartutigut tunngavissaqassammata – imaanngitsoq aalajangersakkat suna naleqquttuunersoq nammineq naatsorsuutigalugu allanngorartinneqartassasut.