Assi: Toqqorsivik

Nuuk napparsimmavittaassaaq

Nuummi 17.000-it sinnerlugit inulimmi pitsaanerusumik peqqinnissakkut sullissineq ingerlanneqassaaq. Atassut sinnerlugu Inatsisartunut qinigassanngortittoq, Uthilie Heilmann, apriilip sisamaani Nunarput’mut oqarpoq.

– Sinerissamiit napparsimmavimmut suliaritikkiartortut aamma Nuummi najugaqartut pitsaanerusumik sullinneqartalernissaat anguniarlugu Nuummi immikkut napparsimmaviliortoqaruni tamanut ajunnginnerussaaq. Taamaalilluni tamatta sullinneqarnerput pitsanngornerussaaq, aamma Nuummi najugaqartut napparsimmaveqarnikkut sullinneqarnerat ullumikkut kipiluttunaqisoq utaqqinaqisorlu aaqqinneqarsinnaassaaq, Uthilie Heilmann oqarpoq.

Maanna Partii Naleraq suliassamik tigusivoq.

Aamma atuaruk: Peqqinnissaqarfik innuttaasut pillugit atavoq

Nuummi innuttaasunut nakorsiartarfittaartariaqartoq, Partii Naleraq ilisimatitsivoq. Sineriammi nakorsiarniartarneq innuttaasunut pitsaanerusariarpoq, Partii Naleraq allappoq.

– Nalunngilarpummi tusartuarlugulu innuttaasut peqqiilliorlutik imaluunniit misissortinniarlutik nakorsiarniartarnerminni assut kipiluttunartunik peqqinnissaqarfimmiit nalaataqartuartut. Tamanna pillugu politikikkut piaartumik aaqqiiniartariaqartugut Partii Naleqqamit isumaqarpugut, Jens Napãtôk oqarpoq.

– Taamaattumik Nuummi nakorsiartarfiliortoqarasuarnissaq pisariaqarpoq. Taamatut nunarput tamakkerlugu aaqqiiniarnermi aningaasanut inatsisissamut isumaqatigiinniutinut ilaatitassatta ilaat saqqummiupparput, Jens Napãtôk oqarpoq.

Nuummi piffissarujussuaq atorlugu nakorsiarnissamut inniminniiniartarneq aaqqinniarneqartariaqarpoq aamma sineriammiit SANA annertuumik atugaanera innarliisarsinnaammat periarfissat ilaattut sakkortuumik kaammattuutigerusupparput Nuummi nakorsiartarfiliortoqassasoq, Nuummiittunut atorneqartussamik, Partii Naleraq allappoq.

– Nuummi innuttaasut amerliartuinnarput aammalu peqqinnissaqarfiup pitsanngorsaavigeqqinnissaanut ilanngullugu nakorsiartarfiliornissaq sulissutigineqarluni suliarigasuarnissaa Partii Naleqqamiit matumuuna kaammattuutigaarput piaartumik aaqqiiffiginiarneqarnissaa angujumallugu, Partii Naleraq naggasiivoq.

Aaqqissuisut

Nunarput pillugu sammisaqarfik