Nunavummi qimuttut qiorartut

Qimmit qumuttuinnik qimminillu nalinginnaasunik akusat tamarmik issisiorsinnaanngillat. Tamanna Nunavummi Nunavimmilu sapaatip-akunnerani kingullermi siunersineqarpoq. Nunavummi Rankin Inletimi sapaatit-akunnerini kingullerni qimmit arlallit qiullutik toqusarsimapput.

Naak qimmit ilaat silami oqquiffissaqartinneqaraluartut silap issinnerujussua pissutigalugu timaasa nillertippallaarnerat pissutigalugu toqusarsimapput, Nunatsiaq News allappoq.

Tupaallaatissaanngilaq Nunavummi Nunavimmilu ukiukkut issittarnera, kisianni februaarip ingerlanera tamangajaat issisiut -30 gradini inissisimasimavoq, sapaatillu-akunerata kingulliup ingerlanerani -45 gradit anguneqartarsimapput. Nunavummi Nunavimmilu issittaqisumi tamanna ulluinnarsiutaanngilaq.

Qimmiutillit ilaat, Page Burt oqaasivoq, qimmit immikkut nakkutigineqartariaqartut.

– Taamak issitsiginera qimminut navianarpoq, aamma qimmiutillit arlallit oqquiffissaqartitsisanngillat, Page Burt oqarpoq.

Rankit Inletimi qatserisartut, aamma illoqarfimmi politiitut sulisut, piginnittuisa silataani qimmit qerrussuullutik toqararsimasut sapaatip-akunnerani kingullermi naammattoortarsimavaat.

Ataaseq golden retriverimik akusaasimavoq, allallut huskynik akusaallutik. Qimmit tamakku qimuttuittulli issimut akiuussutissaqanngillat, tassami meqquisa sananeqaataat allanngorsimasarmat.

– Uumasut tamakku issinnerani isersimatinneqartariaqarput, Page Burt oqarpoq. Qimmiutillit isumannaartariaqarpaat oqquiffissat iluamik inissinneqarsimanissaat, aamma anorimit toqqaannaq pitarneqarsinnaasanngillat, ajornanngippallu silataat oqorsarneqarsimasariaqarput, soorlu amit atorlugit, Burt oqarpoq.

– Qimmiutit nillertissimalersoq naammattoorukku, taava illumut isertissavat, kisianni ingerlaannaq kiattumukartinneqassanngilaq. -60 miit 27 gradinut nuukkukku, allanngorneq annertoorujussuuvoq, aamma tamanna uummataata unissutigisinnaavaa, Page Burt, Nunatsiaq Newsimut oqarpoq.

 

Aaqqissuisut

Nunarput pillugu sammisaqarfik

%d bloggers like this: