Nunavummi naalakkersuisut Inuktitut oqalussasut

Nunavummi naalakkersuisut siulittaasuat, Paul Quassa, ukiut sisamat ingerlanerani pisortani atorfillit tamarmik Inuktitut oqaluttalernissaanik anguniagaqassalluni oqarpoq.

– Piviusorsiortuuvoq, pissutsit ileqquliussimasavut akimorlugit eqqarsassaasut, Paul Quassa oqarpoq.

Paul Quassa oqarpoq, naalakkersuisut kissaatigigaat Inuktitut oqalunnissaq tamanut pinngitsoorani ilinniagassanngortinneqassasoq, aamma tamanna ukiuni tulliuttuni sisamani ingerlanneqassasoq.

Marlunngormat Nunavummi inatsisiliortut ataatsimiinneranni naalakkersuisut piginnaatsitsissutaat tunniuppaa, taaguuserlugu “Turaaqtavut” (anguniagassavut, aaqq.).

– Nunavut 1999-mi pilersinneqarami inuiaqatigiit allanngortinnissaanut isumalluartoqarsimavoq. Pitsanngoriaatsit arlallit naammassineqarsimapput, kisianni tamanna kigaappallaammik ingerlasimavoq, Paul Quassa saqqummiinermini ilaatigut oqarpoq.

Anguniagassatut taakkartorneqartut arlalippassuupput, soorlu ilanngullugu tuluttut franskisullu ilinniartitsinerup nukittorsarneqarnissaa, peqqinnissaqarfiup pitsanngorsarneqarnissaa, ilinniartitaaneq il. il.

Pingasunngormat CBC Northimut apersorneqarluni, Paul Quassa erseqqissaavoq, piginnaatsitsissutip ukiuni tulliuttuni sisamani ingerlanerani Inuktitut atuillunilu ilinniartussaaneq nukittorsarniarlugu.

– Naalakkersuisut atuuttut inunnut tamanut atoqqusissapput. Taamaallaat taamaaliornikkut suliassaq naammassineqarsinnaavoq, Quassa oqarpoq.

– Ileqquliussimasavut akimorlugit eqqarsassaagut. Naalakkersuinermi oqaatsitta atorneqarnissaat pillugit imminut pisussanngortereernikuuvugut. Tamanna ullut tamaasa takusarparput, apeqqutaasorli tassaavoq tamassuma pitsaanerulersinnissaa, Paul Quassa oqarpoq.

Aperineqarami tamanna ilumut anguneqarsinnaanersoq, Quassa akivoq:

– Inuktitut amerlanerussuteqartunit atorneqarput. Taamaattumik ajornanngilaq, Paul Quassa oqarpoq

Naatsorsueqqissaartarfik, StatsCan, naapertorlugu Inuit pingajorarterutaat Inuktitut oqaluttuupput, tamannalu 2011-miit allanngorsimanngilaq.

Nunavummi inuit 38.000-t missaat najugaqarput taakkunanngalu 30 procentit sinnerlugit 15-t ataallugit ukioqarput.

Paasisaqarnerorusukkuvit una ornissinnaavat: https://gov.nu.ca/eia/news/premier-quassa-releases-turaaqtavut