Nunavummi cannabis pillugu tusarniaasut

Canadami naalakkersuisut pilersaarutigaat 2018-mi juulimi cannabisip inerteqqutaajunnaarsinnissaa siunertaralugu Ottawami inatsisartunut siunnersuuteqarniarlutik, taamalu inatsisissatut siunnersuut innuttaasunut oqaluuserisassanngortissimallugu.

Inatsisissatut siunnersuummi cannabisi inerteqqutaajunnaarsinneqassappat qanoq ilusilersuisoqassanersoq pineqarpoq.

david_akeeagok
Aningaasaqarnermut naalakkersuisoq, David Akeeagok

Siunnersuummi siunertarineqarpoq, Canadami nunat immikkoortortaqarfiillu tuniniaanermut siammerterinermullu oqartussaaffeqassasut, ilaatigut makku nakkutigisassaralugit: pisinermi ukioqqortussutsit, sunnerneqarsimalluni biilernerit, suliffeqarfinni sillimaneq aamma silami cannabisitorneq.

Canadami naalakkersuisut nunap immikkoortuini naalakkersuisut aqqutigalugit innuttaasut tusarniaavigaat, taakkulu kingusinnerpaamik ukioq manna juulimi akissuteqartussaapput.

Tamatumunnga atatillugu Nunavummi naalakkersuisut juuli nallertinnagu inerteqqutaajunnaarsitsinissaq pillugu isummertussaapput. Aallaqqaamut interneti aqqutigalugu 16-leereersimasut isumasiorneqarsimapput, ilaatigut apeqqutit makku sammineqarsimallutik: Cannabis qanoq nakkutigineqarluarsinnaava aamma Nunavummi tuniniaaneq qanoq nakkutigineqassava. Toqqaannaq tusarniaaneq 2017-mi aggustip 22-aniit sitsip 22-ata tungaanut ingerlanneqarsimavoq.

Naggasiutaasumik ukioq manna januaarimi februaarimilu innuttaasunik tusarniaaneq ingerlanneqarpoq, taannalu aningaasaqarnermut naalakkersuisumit, David Akeeagokimit, siulersorneqarpoq. Tusarniaanerit inoqarfinni makkunani pipput: Rankin Inlet, Arviat, Coral Harbour, Kugaaruk, Cambridge Bay,
Kugluktuk, Iqaluit, Cape Dorset, Kimmirut, Igloolik aamma Arctic Bay.

Naak sumiiffinni arlalinni tusarniaaneq kinguartinneqartarsimagaluartoq, taamaattoq pissusissamisut naammassineqartoq oqaatigineqarpoq.

 

Aaqqissuisut

Nunarput pillugu sammisaqarfik

%d bloggers like this: