Nunarput ‘pisortatigoortumik’ aallartippoq

Nunarput aallartippoq – imaluunniit aallartivippoq. Februaarip 16-ani Nunarput piareersarneqarluni aallartinneqarpoq, piareersaanerullu nalaani nunarput.gl aamma nunarput.com aqqutigalugit takuneqarsinnaajuarsimavoq, taamaattoq nittarsaanneqarani.

Taamaakkaluartoq inunnit ilisimaneqaleriartornera malunnarsimavoq, kikkuugaluarnersullu Facebookikkut maluginiaqqummassuk alakkarneqartalersimavoq.

Nunarput Kalaallit Nunaanni najugaqartugut aallaavigaluta oqaatsivullu atorlugit tusagassiornermik ingerlatsiviuvoq. Pingaarnertut siunertarineqarpoq inuiaqatigiinnut tunngasut assigiinngitsut ilisimatitsissutigisarnissat, taamalu tamatigoornerusumik assigiinngisitaarnerusumillu nutaarsiassalerineq qulakkeerneqaqqullugu, ullumikkullu uagut akunnitsinni pingaartitavut nunarsuarmioqatitsinnullu tunngasut ilanngullugit.

Inuiaqatigiinni oqallinnerup nukittorsarneqarnissaa pingaartillugu qitiutinneqarpoq, inuillu nalinginnarmik, pingaartumik kalaallisut oqaasillit, oqaaseqartinneqarnissaminnut periarfissinneqarneq ajortut, nipaasa tusarsaanerulernissaat ilanngullugu pingaartinneqarpoq.

Oqaluttuarisaanerput alakkarutsigu, inuit akornanni oqallinnerni uteqqiasumik kalaallisut nittarsaaveqalernissaa kissaatigineqartarsimavoq, oqallinnerlu taamak sammivilik pineqaleraanngat piviusorsiornera apeqqusersorneqartarpoq. Taamaattoq eqqumiissaaq Kalaallit Nunaanni kalaallisut nutaarsiassaqartitsineq ingerlanneqarsinnaannanilu pisariaqartinneqanngippat.

Nutserineq sumilu aaqqissuisoqarfeqarneq immini ajornartorsiutaanngillat. Sunali aallaavigalugu isikkivigalugulu eqqortuussorisaqarneq apeqqutaapput, aamma illuinnaassiortuinnarmik tusagassiorneq atuuffissaqanngilaq.

Naammattumik pisariaqartinneqarani allatut ajornartumik unittariaqassappat, taava minnerpaamik misilinneqarsimassaaq. Pilersaarusiortut pingaartissimasaat tassaavoq, unittariaqalernera piareersarnerlussimanermik, asuliinnaq suliaqarnermik assigisaanillu tunngavilersorneqarsinnaassanngitsoq. Unissaguni tapersersuisut pisariaqartitsisullu naammassimannginnerannik pissuteqassaaq.

Taamaattumik ilanngutassioqataarusullutik kajumittut, pingaartumik sineriassuatsinni pisut pillugit, una aqqutigalugu saaffiginnissinnaapput, aamma;
Nunarput una aqqutigalugu tapersersoruk, aamma;
Nunarput una aqqutigalugu ussassaaruteqarfigiuk.

Apuulluarit.

 

%d bloggers like this: