Nunarput pillugu

Nunarput tassaavoq internetikkut nutaarsiassaqartitsivik, soqutigisaqaqatigiinnut politikikkullu suliniaqatigiinnut arlaannaannulluunniit attuumassuteqanngitsoq. Inuit isummersornerat illersorparput, taamalu tamat oqartussaaqataatillugit inuiaqatigiit ingerlanneqarlutillu ineriartortinnissaat pingaartillutigu.

Pingaarnertut siunertarineqarpoq inuiaqatigiinnut tunngasut assigiinngitsut ilisimatitsissutigisarnissat, taamalu tamatigoornerusumik assigiinngisitaarnerusumillu nutaarsiassalerineq qulakkeerneqaqqullugu. Inuiaqatigiinni oqallinnerup nukittorsarneqarnissaa pingaartillugu qitiutinneqarpoq, aamma illuinnaasiunnginnissaq qitiutinneqarpoq. Aaqqissuisut isummersorsimatillugit tamanna erseqqissumik nalunaarsimasarpoq, qanga “pingaarnertut” allatatut tusagassiorfiit nalinginnarmik taasagaat, taakkulu ‘Isuma’ ataani inissinneqartarput.

Tusagassiortut puigortagaanik apeqquteqartarpugut, aamma politikikkut ingerlatsisut avaqqutaarniarsaralugulu kissaatiginngikkaluaraangassulluunniit.

Nunarput imminut pigaluni ingerlanneqassaaq aamma allaaserisat tamarmik tusagassiornermut ileqqoreqqusat naapertorlugit suliarineqartarput, ukuli immikkut erseqqissarumavagut:

  • Sammisami sunarpiaq pineqarnersoq aallaavigalugu allaaserinnittoqassaaq, aamma allaaserisamut tunuliaqutaasut tamaasa paasiniareersimanerisa kingorna.
  • Inunnut ataasiakkaanut malersuinertut isikkulinnik sammisaqarnissaq soqutigineqanngilaq aallunneqarnavianngilarlu – pineqartup iternga salliutinneqartuassaaq.
  • Inuiaat – inuit inatsisitigut illersugaanerannik pingaartitsisut – pingaartippavut; kikkut tamarmik assigiimmik periarfissaqartitaanerat inuiaqatigiinni toqqammaviulluinnarluni inissisimavoq.
  • Isumaqatissarsiorluni sunniiniarlunilu tusagassiorneq aaqqissuisoqarfimmit akuersaarneqanngilluinnarput. Tusagassiuutini suliaqarnermi tamanna suliassaanngilaq. Atuartartutta sunniiniarfigineqaratik namminneq isummersinnaanerat ataqqivarput.
  • Nunarput Kalaallit Nunaanni nutaarsiassaleriviuvoq, kalaallisut oqaatsivut atorlugit allanneqartartoq – ullullu tamaasa nutaarsiassaqartitsisoq.
  • Nunarput nuna tamakkerlugu nutaarsiassaqartitsissaaq, sumiiffinnilu tamani inuit suleqatigalugit tamanna ingerlanneqassaaq.
  • Ilanngutassiortut tikilluaqqusaapput – sumiiffiit isikkiviat aallaavigalugu susoqarneranik tusagaqarnissaq tamatta pisariaqartipparput. Ilanngutassiortut atuakkiortariaqanngillat – naatsumik allanneq oqaasilaarnerluunniit naammapput, taava sinneri aaqqissuisoqarfimmit suliarineqassapput.

Kalaallit aallaaviat oqaasiilu tunngavigalugit tusagassiornermik nunatsinni ingerlatsisoqarnissaa uteqqiasumik kissaatigineqartarsimavoq, aamma oqallinneq taamak imalik pineqaleraangat piviusorsiornera apeqqusersorneqartarpoq. Taamaattoq eqqumiissaaq Kalaallit Nunaanni kalaallisut nutaarsiassaqartitsineq pisariaqartinneqanngippat.

Nutserineq sumilu aaqqissuisoqarfeqarneq immini ajornartorsiutaanngillat. Sunali aallaavigalugu isikkivigalugulu eqqortuusorisaqarneq pingaaruteqarluni inissisimallunilu apeqqutaavoq isiginngitsuusaarneqarsinnaanngitsoq.

ANGUNIAGAQ
Kalaallinut tamanut paasissutissiissuteqarnerusumik imminnullu ataqatigiinnerusumik inuuneqarnissap periarfissiissutiginissaa

PINGAARTITAT
Uppernassuseq
Pitsaasumik suliaqarneq
Attaveqaqatigiinneq
Tatiginninneq